Tags-Sad

samay kī āñkhoñ se dekhiye to har ek khañDar meñ chhupe mileñge
kahīñ pe bachpan kahīñ javānī kahīñ buḌhāpā kahīñ udāsī

jahāñ jahāñ par qadam rakhoge tumheñ milegī vahīñ udāsī
ye raaz kuchh is tarah samajh lo makāñ mirā hai makīñ udāsī

udāsī mū-qalam hai naqsh meñ rañg-e-malāl ubhrā
tamannāoñ ke pas-manzar se dil ke pesh-e-manzar tak

dukhā hai dil tabhī to mujh pe chhā.ī hai udāsī bhī
mirī palkoñ pe aañsū bhī laboñ par hai ḳhamoshī bhī

ḳhabar kar dī ga.ī hai mezbāñ ko
udāsī bhī hamāre saath hogī

kabhī ḳhamoshī kabhī tabassum kabhī ḳhayāloñ kī dhuñd meñ gum
mirī udāsī to har qadam par qabā badaltī hī jā rahī hai

har ek pal kī udāsī ko jāntā hai to aa
mire vajūd ko tū dil se māntā hai to aa

ek majzūb udāsī mere andar gum hai
is samundar meñ koī aur samundar gum hai

dekhnā chāho udāsī meñ shajar Duube hue
tum parindoñ kī kabhī naql-e-makānī dekhnā

mere saa.e se lipaTne ko tarastī rahtī
ban ga.ī merī talabgār udāsī merī

jab bhī hoñToñ ko hañsāyā yahī pūchhā ḳhud se
kyuuñ hai ḳhushiyoñ pe kaḌā baar udāsī merī

shaam kā ġham bhī jafākār udāsī merī
zaḳhm de jaatī hai har baar udāsī merī

'sārthī' luT na kahīñ jaa.e aqad bhī tujh se
mujh se kahtī hai ka.ī baar udāsī merī

mere ashkoñ se bahī ban ke lahū dil kā yuuñ
ho kaTīlī koī talvār udāsī merī

gahre tanhā.ī ke aalam meñ sulā jaatī hai
kitnī ban jaatī hai ḳhūñ-ḳhvār udāsī merī

mere kamre meñ udāsī hai qayāmat kī magar
ek tasvīr purānī sī hañsā kartī hai

udāsī ke daldal meñ girtā huā dil
bachā.ūñ maiñ kaise ye martā huā dil

aaheñ sard huī jaatī haiñ tum aa.e ho yā sub.h huī
chāñd kī rañgat phīkī hai tāroñ pe udāsī chhā.ī hai

bhed khultā hī nahīñ kaisī udāsī chhā.ī
buujh saktā nahīñ koī vo pahelī chup hai

sau gulistāñ jis udāsī par nisār
mujh ko vo afsurdagī darkār hai