Tags-Safar

ḳhush nasīboñ ko ghar milā yaaro
mere hisse meñ phir safar aayā

gard-e-safar meñ kho ga.e, aise hazāroñ rāh-rau
raah meñ jo Thahar ga.e, āñdhiyoñ se jo Dar ga.e

aa rahī haiñ ye umīdoñ kī sadā.eñ paiham
go safar saḳht hai lekin na hirāsāñ honā

tamām raat sarāb-e-safar kā dhaḌkā thā
tamām raat thī ik hā-o-hū kī vīrānī

ek hī jast meñ tai ho ga.ī manzil 'shahzād'
kitne ārām se guzrā safar-e-parvāna

bujh ga.ī sham.a kaTī raat ga.ī sab mahfil
ab akele hī kaTegā safar-e-parvāna

savār aate nahīñ haiñ lauT kar jin ghāTiyoñ se
safar is khūñT kā ik pā-pyāda chāhte haiñ

kaun haiñ kis jagah haiñ ki TuuTā hai jin ke safar kā nasha
ek Duubī sī āvāz aatī hai paiham ki ghar jā.eñge

aap kī ham-safarī ne safar āsān kiyā
varna har gaam yahāñ koh-e-girāñ thā pahle

mujhe kuchh der meñ phir ye kinārā chhoḌ denā hai
maiñ kashtī huuñ safar merā har ik sāhil se aage hai

na.ī mushkil koī darpesh har mushkil se aage hai
safar dīvāngī kā ishq kī manzil se aage hai

haqīqat se tasavvur tak safar mujh meñ kiyā us ne
magar mujh tak nahīñ pahuñchā vo itnī duur chal kar bhī

āvāz koī detā hai sadiyoñ ke safar se
ik pal ke liye jaise Thahar jaatī hai duniyā

kaun kab ruuTh gayā kis ko kahāñ bhuul ga.e
aao kuchh yaad kareñ ḳhatm safar hone tak

jahāñ meñ ranj-e-safar ham bhī khīñchte haiñ magar
jo gum huā hai vahī kārvāñ salāmat hai

ab safar raat meñ hī karte haiñ
log ab raushnī se Darte haiñ

na sarguzisht-e-safar pūchh muḳhtasar ye hai
ki apne naqsh-e-qadam ham ne ḳhud miTā.e haiñ

baiThe-baiThe kā safar sirf hai ḳhvāboñ kā futūr
jism darvāze tak aa.e to galī tak pahuñche

lālach meñ paroñ ke pair chhūTe
ab raḳht-e-safar hai be-asāsī

ghuTī ghuTī hī sahī merī chaah le lenā
safar tavīl hai kuchh zād-e-rāh le lenā