Tags-Safar

yuuñ maiñ āsūda-e-manzil huuñ ki ab gard-e-safar
chūmtī hai mirā naqsh-e-kaf-e-pā mere ba.ad

dil ke jazbāt zamāne ko batāne ke liye
sher-goī kā safar rakkhā hai jaarī ham ne

chand lamhoñ meñ huā kartā hai tai lambā safar
kyā hai vo raftār jo sikkoñ ke pahiye meñ nahīñ

ab manzil-e-sadā se safar kar rahe haiñ ham
ya.anī dil-e-sukūt meñ ghar kar rahe haiñ ham

yuuñ hī apne ghar se nikal aa.e haiñ
safar aaj phir be-irāda kiyā

ab vaqt-e-safar aa pahuñchā hai aa mil baiTheñ do-chār ghaḌī
jab pahle-pahal tum aa.e the āġhāz-e-sahar kā mela thā

jism-o-jāñ kā makāñ huā ḳhālī
aise tanhā safar meñ jo bhī ho

ik tirī yaad bachā kar rakh lī
saarā sāmān-e-safar chhoḌ aa.e

nikle log safar par shab ke jañgal meñ
raushnī bhar de kirnoñ vaale pal pal meñ

abhī se paañv ke chhāle na dekho
abhī yaaro safar kī ibtidā hai

ruke hue bhī safar kar rahī hai ḳhaak mirī
guzar rahī hai guzāre binā hayāt samajh

jise manzil samajh kar ruk ga.e ham
vahīñ se apnā āġhāz-e-safar thā

ab is safar kā silsila shāyad hī ḳhatm ho
sab apnī apnī raah leñ ham ne kahā na thā

ye vo safar hai jahāñ ḳhūñ-bahā zarūrī hai
vahī na dekhnā jo dekhnā zarūrī hai

safar hī bād-e-safar hai to kyuuñ na ghar jā.ūñ
mileñ jo gum-shuda rāheñ to lauT kar jā.ūñ

mar ke yārān-e-adam ke paas pahuñchūñgā 'amīr'
chalte chalte jaan jā.egī safar hai duur kā

pahuñch chuke haiñ idhar ham-safar sar-e-manzil
udhar abhī ḳhalish-e-intizār raah meñ hai

manzileñ bhar de aañkh meñ us kī
us ke pairoñ meñ phir safar rakh de

be-ḳhabar kī kahīñ ḳhabar rakh de
hāsil-e-zahmat-e-safar rakh de

tosha-e-āḳhirat kā fikr rahe
jī se jaane kā hai safar nazdīk