Tags-Safar

tum hue ham-safar to ye jaanā
rāste muḳhtasar bhī hote haiñ

ik safar paañv meñ paḌā huā thā
ek sāmān se nikal aayā

nahīñ hai is niiñd ke nagar meñ abhī kisī ko dimāġh merā
magar kisī ḳhvāb ke safar meñ sipar kareñge charāġh merā

koī jachtā nahīñ alāva tire
varna ik ham-safar to thā mire saath

merā fan goyā hai 'jāmī' raushnī kā ham-safar
merī ġhazloñ meñ nihāñ hai ruuh ke zaḳhmoñ kī guuñj

vo moḌ mere safar kā hai nuqta-e-āġhāz
fareb-ḳhurda-e-manzil hue jahāñ rah-rau

ik safar meñ koī do baar nahīñ luT saktā
ab dobāra tirī chāhat nahīñ kī jā saktī

be-hirs-o-havā be-ḳhauf-o-ḳhatar is haath pe sar is kaf pe jigar
yuuñ kū-e-sanam meñ vaqt-e-safar nazzāra-e-bām-e-nāz kiyā

agarche pā-shikasta ham haiñ ai 'dāġh'
magar qasd-e-safar jaatā kahāñ hai

kyā huā husn hai ham-safar yā nahīñ
ishq manzil hī manzil hai rasta nahīñ

safar tai ho chukā shāyad dar-e-jānāna aatā hai
ki dil sū-e-jabīñ sajde ko be-tābāna aatā hai

kyā safar kis kā makāñ kaisī havā kis kā shajar
tezī-e-par ga.ī ḳhas-raizī-e-minqār ga.ī

ālam-e-be-ḳhudī meñ gahrā saañs
sīna-e-kā.enāt meñ hai safar

raat din yaar baġhal meñ ho to ghar behtar hai
varna is ghar ke to rahne se safar behtar hai

azīzo aao ab ik al-vidā.ī jashn kar leñ
ki is ke ba.ad ik lambā safar afsos kā hai

ham log na nikle to safar kaun karegā
duniyā ko haqīqat kī ḳhabar kaun karegā

safar-girafta rahe kushtagān-e-nān-o-namak
hamāre haq meñ koī faisla na kartā thā

jo dekhiye to jilau meñ haiñ mehr-o-māh-o-nujūm
jo sochiye to safar kī ye ibtidā bhī nahīñ

raat kā āḳhirī pahar bhī
raḳht-e-safar bāñdh rahā hai

nikle kabhī na ghar se magar is ke bāvajūd
apnī tamām umr safar meñ guzar ga.ī