Tags-Safar

gāmzan dil safar par to sākit qadam
chheḌ dī phir unhoñ ne kahānī na.ī

sāmān-e-zauq-o-shauq sameTo safar karo
rahnā zarūr hai to kisī dil meñ ghar karo

na bāñdh raḳht-e-safar pahle soch le 'ḳhusrav'
shikasta naav añdherī hai raat dariyā hai

mire safar meñ hī kyuuñ ye azaab aate haiñ
jidhar bhī jā.ūñ udhar hī sarāb aate haiñ

maiñ chāñd raat kā bhaTkā huā musāfir thā
añdherī raat meñ tanhā kiyā safar maiñ ne

kiyā hai ḳhud hī girāñ ziist kā safar maiñ ne
katar liye the kabhī apne bāl-o-par maiñ ne

phir is ke ba.ad vo mujh se lipaT ke ro.egī
safar kā Thiik se sab intizām kar degī

añdherā baḌh rahā thā umr kī kachchī saḌak par
safar lāzim thā so raftār ko kam kar diyā thā

safar pe jā.ūñ maiñ asbāb aur kyā le kar
ki terī yaad hī kaafī hai rahguzar ke liye

ravāna vo bhī huā hai na.e safar ke liye
talāsh karnī hai roTī mujhe bhī ghar ke liye

azm-e-safar se pahle bhī aur ḳhatm-e-safar se aage bhī
rāhguzar hī rāhguzar hai rāhguzar se aage bhī

muḳhtasar vaqt hai par bāteñ kar
zindagī beach safar bāteñ kar

'munīr' terī ġhazal ajab hai
kisī safar kī kitāb jaisī

zarā sambhal kar qadam baḌhānā
isī safar meñ luTā hai koī

dāman jhaTak ke vādī-e-ġham se guzar gayā
uTh uTh ke dekhtī rahī gard-e-safar mujhe

jo hudūd-e-sub.h meñ ruk gayā use ittifāq-e-safar kaho
maiñ vahī musāfir-e-shām huuñ mire rāste meñ sahar paḌī

tujhe kyā ho qadr malāl kī tū hai nā-rasīda-e-zindagī
jo bahut phire haiñ galī galī tū jabīñ pe gard-e-safar paḌī

hameñ apne ghar se chale hue sar-e-rāh umr guzar ga.ī
koī justujū kā sila milā na safar kā haq hī adā huā

mujhe ham-safar bhī milā koī to shikasta-hāl mirī tarah
ka.ī manziloñ kā thakā huā kahīñ rāstoñ meñ luTā huā

maiñ huuñ ġhazāl-e-mushk-guzīda merā safar hai tiir ke saath
jab hotī hai tez ye ḳhushbū baḌhtī jaulānī aur