Tags-Sahil

itnā hī ġhanī hai jo samundar to kaho vo
sāhil pe bahā laa.e kabhī la.al-o-guhar kuchh

parvarda-e-tūfāñ hai mire dil kā safīna
sāhil kī tarah ye lab-e-dariyā na rahegā

sar-e-sāhil the to ye sail-e-balā kuchh bhī na thā
zad meñ jab aa.e to andāza-e-tūfān huā

kahīñ joḌe meñ koī phuul gūñdhe koī laT khole
fazā-e-sāhil-e-huglī meñ rañg-o-nūr bhartī hai

saikḌoñ log the maujūd sar-e-sāhil-e-shauq
phir bhī vo shoḳh mire saath nahānā chāhe

milā jo dāman-e-sāhil to aisī mauj aa.ī
safīne sauñp diye ham ne nā-ḳhudāoñ ko

vo log itnī der meñ kis samt ko ga.e
sāhil pe aa chukā thā safīna abhī abhī

ret kī daldal milī mujh ko samundar paar bhī
maiñ vahāñ utrā jahāñ sāhil kabhī sāhil na thā

sāhil ke paas 'yās' ne himmat bhī haar dī
kuchh haath paañv mārtā zālim to paar thā

ye narm o nā-tavāñ maujeñ ḳhudī kā raaz kyā jāneñ
qadam lete haiñ tūfāñ azmat-e-sāhil samajhte haiñ

ye apne ḳhuun kī lahroñ meñ Dūbtī kashtī
bhañvar se bhaag ke sāhil pe jā paḌī hogī

zindagī kā lutf tūfāñ meñ hai tuġhyānī meñ hai
haif jo āsūda-e-āġhosh-e-sāhil ho ga.e

tūfāñ ne bhī aañkh khol dī hai
sāhil bhī nazar bachā rahā hai

tūfān-e-balā kī maujoñ meñ kiiñ band āñkheñ aur phāñd paḌe
kashtī ne jahāñ Takkar khaa.ī dil bol uThā sāhil hī to hai

'shahāb' sāhil se bāñdh rakkho abhī purānī vo naav apnī
ki jas pe tūfānī naddiyoñ meñ masāfateñ bhī bahut hui haiñ

mirā dil Dūbne lagtā hai jab ġham ke samundar meñ
mirī kashtī ko sāhil se lagāne kaun aatā hai

tūfān samundar ke na dariyā ke bhañvar dekh
sāhil kī tamannā hai to maujoñ kā safar dekh

koh-o-sahrā meñ bhaTakte sar-e-sāhil phirte
maiñ ne har gaam sadā kī to tumhāre liye kī

dil kī zamīñ tak raushniyāñ thīñ, chehre the, hariyālī thī
ab to jahāñ bhī sāhil paanā kashtī ko Thahrā denā

jam.a haiñ saare musāfir nā-ḳhudā-e-dil ke paas
kashtī-e-hastī nazar aatī hai ab sāhil ke paas