Tags-Sahra

uf ye talāsh-e-husn-o-haqīqat kis jā Thahreñ jaa.eñ kahāñ
sehn-e-chaman meñ phuul khile haiñ sahrā meñ dīvāne haiñ

qaid-ḳhāne se nikal aa.e to sahrā kā hisār
ham se TūTegī ye zanjīr-e-giraftārī kyā

kis ke liye kījiye jāma-e-dībā-talab
dil to kare hai mudām dāman-e-sahrā-talab

maiñ apnī zaat ke sahrā meñ kho gayā 'kausar'
mirī nazar se bhī ojhal haiñ vus.ateñ merī

jab dhartī sahrā sahrā thī
ham dariyā dariyā ro.e the

ham to sahrā meñ haiñ tum log sunāo apnī
shahr se roz mulāqāt to hotī hogī

roz-e-azal se sochte zehnoñ kī ham-safar
sahrā kī dhuup aur ye parchhā.iyāñ tamām

jise samajhte the sahrā vo ik samundar thā
khilā vo shaḳhs to ham kaise aab aab hue

na pūchh haal mirā chob-e-ḳhushk-e-sahrā huuñ
lagā ke aag mujhe kārvāñ ravāna huā

dikhā.ī chashm-e-ġhazālāñ ne halqa-e-zanjīr
hameñ to gosha-e-sahrā bhī qaid-ḳhāna huā

koī dekhe mirī āñkhoñ meñ aa kar
magar dariyā meñ sahrā kaun dekhe

mire vajūd ke ḳhushbū-nigār sahrā meñ
vo mil ga.e haiñ to mil kar bichhaḌ bhī sakte haiñ

ab chaman-zār hī apnā hai na sahrā apnā
kal har ik shāḳh pe mumkin thā baserā apnā

dekhnā hai hameñ ik va.ada-farāmosh 'siyā'
shaam tak dhuup ke sahrā meñ Thaharnā hogā

josh-e-junūñ ko kis liye sahrā kī hai talāsh
sar phoḌne kā lutf to dīvār-o-dar meñ hai

akele milte haiñ sahrā ho yā ki dariyā ho
kisī ke saath nahīñ ham na apne saath koī

rote haiñ bagūle mire dāman se lipaT kar
sahrā bhī tabī.at meñ mire ghar kī tarah hai

shāyad koī bhaTkā hai vahāñ qāfila 'az.har'
sahrā ne mirī ḳhaak na chhānī ka.ī din se

hazār shor sameTe hue hai merā vajūd
mire vajūd ke sahrā ko chashm-e-dariyā likh

sahrā se chale aa bhī ga.e dār-o-rasan tak
honā thā jinheñ vo na hamāre hue logo