Tags-Sahra

sahrā ke ḳhushk siine se chashma ubal paḌā
ragḌe lage jo nanhe se bachche ke paañv ke

raah be-samt hai uftād hai manzil apnī
ḳhāk-e-sahrā huuñ uḌātā hai bagūlā mujh ko

safar hai raat kā sahrā se vāpsī kaisī
tumhāre saare nishānoñ ko le uḌī hai havā

chaliye ab sahrā se kū-e-yār unheñ dikhlā.iye
ābloñ se paañv meñ do-chār āñkheñ ho ga.iiñ

jis mauj se ubhrā thā us mauj pe kyā guzrī
sahrā meñ vo bādal kā TukḌā to bahut royā

dasht o sahrā ye samundar ye jazīre ye pahāḌ
munkashif ham pe ka.ī raaz kiye dete haiñ

sahrā meñ chīḳhte haiñ bagūle to shahr shahr
ik shor hai sukūt-fazā ġhaur se suno

tāqat agar hai paañv meñ sahrā kā ḳhauf kyuuñ
bas ik kushāda raah hai is se ziyāda kyā

hamārī pyaas mukammal ho to qadam bhī uTheñ
rakhe haiñ sāmne dariyā bhī aur sahrā bhī

maiñ chob-e-ḳhushk sahī vaqt kā huuñ sahrā meñ
sahar pukārtī mujh ko to saath chaltā maiñ

sahrā ko der se thī kisī abr kī talāsh
paayā mujhe to vo mire siine se aa lagā

hamāre andar kā ḳhauf 'sābir' shikast dene lagā hai ham ko
lahū kī rut ab guzar ga.ī hai diloñ meñ sahrā utar rahe haiñ

hotā hai nihāñ gard meñ sahrā mire hote
ghistā hai jabīñ ḳhaak pe dariyā mire aage

chup ke sahrā meñ faqat ek sadā kaun huuñ maiñ
ai ḳhudā tū hī batā mujh ko zarā kaun huuñ maiñ

jab bhī aa.eñ mire hāthoñ meñ rutoñ kī bāgeñ
barf ko dhuup to sahrā ko ghaTā de dūñgā

jarnail to sahrā meñ haiñ aur koh meñ karnail
hai shahr meñ chhoḌā mujhe kaptān samajh kar

shāyad koī shahsavār nikle
sahrā pe kamand Dāltā huuñ

kashtī baġhair dasht-navardī ho kis tarah
ashkoñ se bahr ho gayā sahrā nahīñ rahā

josh-e-junūñ se ishq-e-butāñ meñ
siinā huā koh-e-sahrā huā dil

phaaḌ kar dāman-e-sahrā niklā
mere andar se jo dariyā niklā