Tags-Sahra

us ko paane kī aas meñ 'nasrīn'
ham ne sahrā kī ḳhaak chhānī hai

is dopahar kī dhuup ko shāyad ḳhabar nahīñ
sahrā meñ koī mom kā paikar bhī aa.egā

reza reza ho ga.e merī tarah kitne vajūd
ab nahīñ mumkin kisī sahrā meñ majnūñ kā varūd

ab to sahrā meñ samundar kā sakūñ dar aayā
jab se anqā hue haiñ ḳhaak uḌāne vaale

ham sar-phiroñ kā zauq-e-sukūnat na pūchhiye
jab shahr tañg ho ga.e sahrā basā.e haiñ

barsoñ junūñ sahrā sahrā bhaTkātā hai
ghar meñ rahnā yūñhī nahīñ aa jaatā hai

reg-tā-reg huuñ phailā huā sahrā kī tarah
aur sarāboñ kī farāvānī meñ baiThā huā huuñ

ek hoñ nālāñ qafas meñ haa.e ai bulbul ḳhamosh
sun tirā āvāz aur sahrā huā hai sabz-posh

hairat se dekhtā huā chehra kiyā mujhe
sahrā kiyā kabhī kabhī dariyā kiyā mujhe

atā kiyā gayā sahrā is ek shart ke saath
'suhail' ham na kabhī vahshatoñ se yaarī kareñ

husn ik dariyā hai sahrā bhī haiñ us kī raah meñ
kal kahāñ hogā ye dariyā ye bhī to socho zarā

is tilsim-e-roz-o-shab se to kabhī niklo zarā
kam se kam vijdān ke sahrā hī meñ ghūmo zarā

kabhī mansūb rāhat se thā dariyā
baḌā be-dard vo sahrā huā hai

ik āñkheñ dariyā āñkhoñ kā har manzar us meñ Duub gayā
ik chehra sahrā chehroñ kā aur ham sab us meñ rahte haiñ

sahrā ke sar kī maañg hai ab tak vo ik lakīr
hāsil jise ġhurūr tirī rahguzar kā thā

qais ko dekhā thā maiñ ne sar-e-sahrā ik din
sar se pā tak thā faqat dīda-e-hairāñ kī tarah

phuul sahrā meñ khilā de koī
maiñ akelā huuñ sadā de koī

gumāñ hadd-e-nazar tak kyā thā lekin kyā nazar aayā
jidhar dariyā kī maujeñ thiiñ udhar sahrā nazar aayā

kise pukāre koī āhaToñ ke sahrā meñ
yahāñ kabhī koī chehra nazar to aayā nahīñ