Tags-Saqi

saaqī kī nazar se koī nisbat hai to 'anvar'
piine kī adā ye bhī hai be-jām piye jā

nizām-e-maikada saaqī chalegā yuuñ kab tak
chhalak rahe haiñ subū aur tahī haiñ paimāne

taskīn-e-ḳhulq-e-sāqī ko piitā huuñ maiñ sharāb
merī nazar meñ saaqī hai paimāna to nahīñ

ik nigāh-e-nāz ne saaqī kī ye kyā kar diyā
rafta rafta kah uThe sab pīr-e-mai-ḳhāna mujhe

ḳhumār-e-minnat-e-sāqī agar yahī hai 'asad'
Dil-e-gudāḳhta ke mai-kade meñ sāġhar khīñch

rind buḳhl-e-sāqī par kis qadar the kal barham
mai-kada hai aaj apnā aur tañg dāmāñ hai

ye abr shafaq-āgūñ ye sard havā saaqī
ik aur surāhī lā ik aur de paimāna

maiñ ne kab tujh se kahā hai mujhe shak hai saaqī
tere māthe pe sitāroñ kī chamak hai saaqī

dil-e-'ehsās' meñ jo rūh-e-tajallī hai nihāñ
chāñd tāroñ meñ kahāñ us kī jhalak hai saaqī

soz āvāz meñ lahje meñ khanak hai saaqī
ishq kā tere yaqīñ to nahīñ shak hai saaqī

maiñ bahak jā.ūñ to ye merī tunuk-zarfī hai
aur agar nashsha na ho kis kī hatak hai saaqī

mere sāñsoñ meñ jo bas jaa.e to kyā us kā ilaaj
tū nahīñ paas magar terī mahak hai saaqī

ishq ke soz ne naġhmāt ko garmī baḳhshī
ab tire saaz meñ sho.aloñ kī lapak hai saaqī

kyā tirī shoḳhī-e-guftār kī tashrīh karūñ
kitnī shīrīnī hai aur kaisā namak hai saaqī

vo jin kī maut par rote haiñ barsoñ jām-o-paimāna
ab aise bāda-kash hote haiñ ai saaqī kahāñ paidā

ik jur.a dard-e-mai pe ho itnā na talḳh-o-tund
saaqī maiñ aise mast se hoshyār hī bhalā

āḳhirat kā ḳhayāl bhī saaqī
bāda-e-vahm kā ayāġh na ho

nahīñ hai ab tāb-e-zabt baaqī kahīñ maiñ tauba na toḌ baiThūñ
tirā ishāra nahīñ ye saaqī to kyuuñ ghaTā muskurā rahī hai

saaqī jo dil se chāhe to aa.e vo zamāna
har shaḳhs ho sharābī har ghar sharāb-ḳhāna

tishna-lab rakkhā tirī chashm-e-karam ne saaqī
jab mujhe bāda-parastī kā qarīna aayā