Tags-Saqi

saaqī ne jo pilā.ī hamārī hī thī ḳharīd
ham se bhī us ne daam liyā hai kabhī kabhī

mai-kash bhulā sakeñge na saaqī kā ye karam
girtoñ ko us ne thaam liyā hai kabhī kabhī

tirī be-iltifātī ko ḳhudā rakhe ki ai saaqī
sharāb-e-ġham se ham tishna-laboñ par bhī ḳhumār aayā

aish chāhiye jo kuchh so to aaj hai maujūd
jaam o mai hai saaqī hai sair-e-māhtābī hai

saaqī o sharāb o jaam o paimāna kyā
sham.a o gul o andalīb o parvāna kyā

jab maiñ kahā ye us se 'saudā' se apne mil ke
is saal tū hai saaqī aur mai-parastiyāñ haiñ

bāda-o-sāqī-o-mutrib kā na lo naam abhī
gard-ālūd hai ā.īna-e-ayyām abhī

maiñ ġhash huā kahā juuñ saaqī ne mujh se hañs kar
ye sabz jaam terā aur surḳh jaam merā

baat saaqī kī na Taalī jā.egī
kar ke tauba toḌ Daalī jā.egī

hai tishna-labī lekin ham kyuuñ use zahmat deñ
apnā hī lahū pī leñ saaqī ko jagā.eñ kyā

chashm-e-sāqī ke alāva jām-e-ḳhālī ke sivā
kaun apnā āshnā aġhyār kī mahfil meñ thā

the tirī bazm meñ sab jām-ba-kaf ai saaqī
ik hamīñ tishna-dahan the tire maiḳhāne meñ

saaqī bane hue haiñ vo sāġhar shab-e-visāl
is vaqt koī mirī qism dekh jā mujhe

ye rañg-e-bahār-e-ālam hai kyuuñ fikr hai tujh ko ai saaqī
mahfil to tirī suunī na huī kuchh uTh bhī ga.e kuchh aa bhī ga.e

dost se kah deñ dil-e-be-mudda.ā kī dāstāñ
aaj saaqī se shikast-e-jām kī bāteñ kareñ

mirī nigāh meñ vo riñd hī nahīñ saaqī
jo hoshiyārī o mastī meñ imtiyāz kare

to aap hai paimāñ-shikan is daur meñ saaqī
kahtā hai mujhe bazm meñ paimāne ko mat chheḌ

abhī raat kuchh hai baaqī na uThā naqāb saaqī
tirā rind girte girte kahīñ phir sambhal na jaa.e

savāl-e-besh-o-kam-e-mai nahīñ magar saaqī
kabhī tujhe bhī shu.ūr-e-shumār aa.egā

sab ḳhālī gilāsoñ ko 'ziyā' thāme hue haiñ
saaqī hai ki paimāna ulaTtā hī nahīñ hai