Tags-Saqi

vo jo tasbīh liye hai us ko
mere aage se uThā de saaqī

haiñ ye riñd-o-sāqī hisāb meñ
kabhī sochā bhī na thā ḳhvāb meñ

ḳharīdā jā nahīñ saktā hai saaqī zarf rindoñ kā
bahut shīshe pighalte haiñ to ik paimāna bantā hai

tunuk-mizāj hai saaqī na rañg-e-mai dekho
bhare jo shīsha chaḌhāo ki jashn kā din hai

vo jām-e-kufr-parvar bhar de ki mast kar de
mastoñ ke dil meñ saaqī īmān rah na jaa.e

jaldī subū ko toḌ ke sāġhar banā le ab
saaqī is amr-e-ḳhair meñ tāḳhīr ho na jaa.e

luñDhā de mai-e-surḳh tū ab to saaqī
ghaTā uTThī hai dekh kyā kaalī kaalī

ho ke māyūs maiñ paimāna bhī jab toḌ chukā
chashm-e-sāqī se piyā pe ka.ī paiġhām aa.e

sab ko saaqī ne nahīñ baḳhshā dil-e-dard-āshnā
jitne ahl-e-zarf the utne hī paimāne bane

dekhnā kam-nigahī kījiyo mat ai saaqī
ba-juz-ushshāq hai mai sab ko barābar pahuñche

baḌhā.ī mai jo mohabbat se aaj saaqī ne
ye kāñpe haath ki sāġhar bhī ham uThā na sake

chashm-e-sāqī se kahāñ pī hai ki gir kar na uTheñ
jaam se pī hai sambhal jā.eñge rafta rafta

bazm-e-charāġhāñ jhūTī ḳhushiyāñ naḳhvat-e-sāqī tishna-dahānī
gardish-e-sāġhar ālam-e-mastī tundī-e-sabā kyā nahīñ dekhā

sunī haiñ fayyāziyāñ tumhārī tumhāre mastoñ meñ hai ye shohrat
hai mere saaqī kā ye vatīra ki jaam bhar kar ubaal denā

jaam ḳhālī nahīñ hai chehre se kam
aaj saaqī ne muft kaaTā peT

yahī sahbā yahī sāġhar yahī paimāna hai
chashm-e-sāqī hai ki mai-ḳhāne kā mai-ḳhāna hai

mujh se dariyā-nosh ko saaqī pilātā hai sharāb
dekhtā huuñ maiñ bhī zarf-e-shīsha-o-paimāna aaj

faqat ik jurm-e-haq-goī ke chalte terī mahfil meñ
tire 'āsif' kī mastī mojib-e-tāzīr hai saaqī

tire hirmāñ-nasīboñ kī bhī kyā taqdīr hai saaqī
ba-har-sūrat vahī zindāñ vahī zanjīr hai saaqī

bahār aa.ī qafas ke dar khule bādal uThe barse
duā lekin hamārī tishna-e-tāsīr hai saaqī