Tags-Saqi

is abr meñ chaman ne kyā kyā kiyā hai saaqī
asbāb mai-kashī kā tayyār terī ḳhātir

surāhī muzmahil hai mai kā piyāla thak chukā hai
dar-e-sāqī pe har ik aane vaalā thak chukā hai

us ek jaam ne saaqī kī jo atā Thahrā
sukūñ diyā hai na kuchh dard meñ kamī kī hai

chashm-e-sāqī na kahīñ apnā bharam kho baiThe
aur kab tak ye mirī pyaas ko bahlā.egī

merā saaqī hai baḌā dariyā-dil
phir bhī pyāsā huuñ ki sahrā huuñ maiñ

ye hai bazm-e-mai-noshī is meñ sab barābar haiñ
phir hisāb-e-sāqī meñ suud kyuuñ ziyāñ kyuuñ hai

phaT jaate haiñ zaḳhm-e-dil-e-betāb ke añgūr
saaqī tire hāthoñ se jo sāġhar nahīñ miltā

lā sāġhar-e-mai shitāb saaqī
bārān-e-sahāb ḳhuub hai ḳhuub

laboñ se lagte hī ho ga.ī thī tamām sardī dil-o-jigar meñ
diyā thā saaqī ne raat ham ko kuchh aise mai kā ayāġh ThanDā

kuchh hosh nahīñ mujh meñ rahā jab se pilā.ī
us nargis-e-maḳhmūr kī saaqī ne pyālī

ho salīqe se bahaknā to maza detā hai
mire saaqī ko gumāñ hai ki bahut hosh meñ huuñ

jaam detā thā udhar saaqī ba-minnat haath joḌ
is taraf kyā kyā lagāvaT dilbaroñ kī thī na.ī

jām-o-paimāna se mai-ḳhāna se kyā kaam use
ho ke saaqī kī nigāhoñ se jo sarshār aa.e

na jaane kyā hai ki merī hastī kisī kī āñkhoñ kā mai-kada hai
subū bhī maiñ huuñ huuñ maiñ hī saaqī ayāġh maiñ huuñ sharāb maiñ huuñ

dekh saaqī ko apne dariyā-dil
zarf-e-mai-kash baḌhā.e baiThe haiñ

jaam jab tak na chale ham nahīñ Talne vaale
aaj saaqī tire fiqre nahīñ chalne vaale

kyā hukūmat mire saaqī kī hai mai-ḳhāne meñ
jitne sāġhar haiñ ishāre pe haiñ chalne vaale

saaqī ke paas vus.at-e-mashrab ne raah dī
maiñ kāsa-e-falak evaz-e-jām le gayā

agar mai-ḳhvār ik ik buuñd ko saaqī taras jaa.eñ
tire jām-o-subū se tere maiḳhāne se kyā hāsil

hosh to uḌ ga.e āñkhoñ se hī pī kar saaqī
ab zarā vo bhī pilā de jo galā tar kar de