Tags-Saqi

kyā mai-kade kā nazm bhī tabdīl ho gayā
saaqī jo daur-e-jām idhar thā udhar na thā

maiḳhāna-e-hastī meñ ham ne ye rañg nayā dekhā saaqī
jin bāda-kashoñ ko hosh nahīñ vo hosh kā da.avā karte haiñ

tark-e-mai kī huī talāfī yuuñ
naam saaqī kā sub.h o shaam liyā

nazar aate haiñ kuchh añgūr mujh ko ai mire saaqī
lahū tauba kā un ke ek ik daane meñ rakh denā

kahāñ ham DhūñDte tujh ko phireñge us ghaḌī saaqī
subūhī ke liye thoḌī sī paimāne meñ rakh denā

dobārā phir kisī din mere kaam aa.egī ai saaqī
jo mai piine se bach jaa.e vo paimāne meñ rakh denā

chashm-e-sāqī pur-tabassum mai-kadā bahkā huā
aao qismat ko harīf-e-kahkashāñ karte chalo

tez hai aaj dard-e-dil saaqī
talḳhi-e-mai ko tez-tar kar de

na mai-kada na vo mai-ḳhvār aur na vo saaqī
na vo chaman na bahāreñ na vo ghaTā.eñ rahīñ

mai-parastāñ ḳhum-e-mai muñh se lagā.e hī bane
ek din gar na huā bazm meñ saaqī na sahī

badaltā hai har daur ke saath saaqī
ye duniyā hai kitnī baḌī inqilābī

vaa.iz ke maiñ zarūr Darāne se Dar gayā
jām-e-sharāb laa.e bhī saaqī kidhar gayā

phir ik fareb meñ ye shab guzar na jaa.e kahīñ
qasam na khā mire saaqī ki raat jaatī hai

kisī bahār kā naġhma koī suhānī ġhazal
tū gungunā mire saaqī ki raat jaatī hai

shab-e-visāl kī ḳhushbū fazā kī rañgīnī
kahīñ se lā mire saaqī ki raat jaatī hai

hai merī jaan mirī jaañ tire tabassum meñ
tū muskurā mire saaqī ki raat jaatī hai

ki tū manā.e mujhe is liye maiñ rūThā huuñ
mujhe manā mire saaqī ki raat jaatī hai

qarīb ho ke bhī 'āzim' ke tū qarīb nahīñ
palaT ke aa mire saaqī ki raat jaatī hai

subū uThā mire saaqī ki raat jaatī hai
nazar milā mire saaqī ki raat jaatī hai

mahfil-e-sāqī salāmat bazm-e-anjum barqarār
nāznīnān-e-haram par rahmat-e-parvardigār