Tags-Saqi

jo maze aaj tire ġham ke azāboñ meñ mile
aisī lazzat kahāñ saaqī kī sharāboñ meñ mile

ġhash huā gardan-e-sāqī pe kabhī aañkh pe luuT
kabhī shīsha pe girā maiñ kabhī paimāne par

gardan-e-shīsha jhukā de mire paimāne par
san barastā rahe saaqī tire maiḳhāne par

tabassumoñ ne nikhārā hai kuchh to saaqī ke
kuchh ahl-e-ġham ke sañvāre hue haiñ mai-ḳhāne

hayāt laġhzish-e-paiham kā naam hai saaqī
laboñ se jaam lagā bhī sakūñ ḳhudā jaane

saaqī nigāh-e-mast se detā hai jab kabhī
lagte haiñ chaar chāñd hamāre surūr meñ

saaf qulqul se sadā aatī hai āmīn āmīn
apne saaqī ko jo ham riñd duā dete haiñ

muġhbache ḳhush haiñ ki bazm un kī hai saaqī un kā
bar-sar-e-kār vahī pīr-e-muġhāñ hai ki jo thā

duniyā se dar-guzar ki guzargah ajab hai ye
darpesh ya.anī 'mīr' hai jaanā jahāñ se bhī

ashkoñ se jaam bhar ga.e saaqī kī yaad meñ
kuchh to ma.āl-e-majlis-e-rindāna ho gayā

jaam de saaqī nau 'uzlat' ko ki jaatī hai bahār
rove hai fasl-e-gul-o-abr-e-bahārāñ mujh ko

saaqī ho mai ho gaa.eñ parī-zād sab bahār
sāġhar se jald chalne meñ charḳh-e-dutā na ho

bahakne de zarā rindoñ ko saaqī
yahī hañgāma jān-e-mai-kada hai

apne mastoñ kī ḳhairāt saaqī
ek sāġhar mujhe bhī atā ho

aao ai saaqī shitābī aa ke sham-e-bazm ho
saarī majlis intizārī meñ tirī bechain hai

ab khetoñ meñ gandum hī nahīñ sonā bhī ugegā ai saaqī
baḳhshegā taġhayyur bhūkoñ ko ik roz mizāj-e-zarrātī

haiñ tañg tirī mai-kash saaqī ye paḌh ke namāz aatā hai yahīñ
yā shaiḳh kī tauba tuḌvā de yā vaqt badal maiḳhāne kā

vaa.iz na sunegā saaqī kī lālach hai use paimāne kā
mujh se hoñ agar aisī bāteñ maiñ naam na luuñ maiḳhāne kā

lamha-e-fikr se saaqī kī muravvat ke liye
bazm-e-rindāñ meñ chale jaam kidhar se pahle

saaqī ke husn-e-dīda-e-mai-gūñ ke sāmne
maiñ jalva-e-bahisht ko Thukrā ke pī gayā