Tags-Saqi

saaqī maiñ dekhtā huuñ zamīñ āsmāñ kā farq
arsh-e-barīñ meñ aur tire āstāne meñ

mai-ḳhāna-e-hastī meñ saaqī ham donoñ hī mujrim haiñ shāyad
ḳhum tū ne bachā ke rakkhe the paimāne maiñ ne toḌe haiñ

mai-e-be-ḳhudī kā saaqī mujhe ek jur.a bas thā
na kabhī nasha utartā na kabhī ḳhumār hotā

terī fayyāzī se kab inkār hai saaqī magar
aise mai-kash bhī haiñ kuchh jin tak na paimāne ga.e

dil o diiñ naqd lā saaqī se gar saudā kiyā chāhe
ki us bāzār meñ sāġhar matā-e-dast-gardāñ hai

mire dil ko na rakh be-rañg saaqī
ki har sāġhar gulābī ho rahā hai

tamāshā dekh sailāb-e-bahārī par habāboñ kā
uThā lā shīsha saaqī abr se sāġhar baraste haiñ

mai-ḳhāne meñ baḌhtī ga.ī tafrīq-e-nihāñ aur
shīshe kā bayāñ aur hai saaqī kā bayāñ aur

shukrāna-e-sāqi-e-azal kartā hai 'ātish'
labrez mai-e-shauq se paimāna hai us kā

saaqī ne mere naam pe sāġhar paTak diyā
tishna-labī ko merā muqaddar kahā gayā

havā zamāne kī saaqī badal to saktī hai
hayāt sāġhar-e-rañgīñ meñ Dhal to saktī hai

mahfil meñ aa.ī kis kī sadā-e-shikast-e-dil
saaqī ke haath ruk ga.e sāġhar Thahar ga.e

dard kī daulat-e-bedār atā ho saaqī
ham bahī-ḳhvāh sabhī ke haiñ bhalā ho saaqī

sīna-e-shauq meñ vo zaḳhm ki lau de uTThe
aur bhī tez zamāne kī havā ho saaqī

sa.ī-e-tadbīr meñ muzmar hai ik āh-e-jāñ-soz
us kā in.aam sazā ho ki jazā ho saaqī

saḳht-jāñ hī nahīñ ham ḳhud-sar-o-ḳhuddar bhī haiñ
nāvak-e-nāz ḳhatā hai to ḳhatā ho saaqī

dast-bosī ko terī ai saaqī
muntazir sāġhar aur subū hai yahāñ

mai-o-sāqī haiñ sab yakjā ahāhāhā ahāhāhā
ajab aalam hai mastī kā ahāhāhā ahāhāhā

ab dushman-e-jāñ hī kulfat-e-ġham saaqī
fariyād laboñ par aa gayā dam saaqī