Tags-Saqi

saaqī hameñ qasam hai tirī chashm-e-mast kī
tujh bin jo ḳhvāb meñ bhī piyeñ mai harām ho

jab jaam diyā thā saaqī ne jab daur chalā thā mahfil meñ
ik hosh kī saa.at kyā kahiye kuchh yaad rahī kuchh bhuul ga.e

ilāj-e-tishna-labī sahl thā magar saaqī
jo dast-e-ġhair meñ hai kab vo jaam lenā thā

paḌtī nahīñ har ek pe us kī nigāh-e-nāz
saaqī ke āstāñ pe hazāroñ paḌe rahe

bahār-e-sabza-o-gul hai karam hotā hai saaqī kā
javāñ hotī hai duniyā mai-kada ābād hotā hai

nasha gahrā kahāñ itnā ki hoñ chaudah tabaq raushan
taraqqī-yāfta mulkoñ kī baada ḳhaam hai saaqī

amal-pairā vahī haiñ ḳhush-ḳhor-o-ḳhush-zī pe saḳhtī se
zabāñ pe jin kī fāqa-kash kā har dam naam hai saaqī

bujhā detā havas kī tishnagī vo jaam hai saaqī
jahāñ maiñ jis se miltā huuñ vahī nākām hai saaqī

vahī zālim haiñ sho.ala-bār insānoñ kī bastī par
vo israel jin par bārish-e-ikrām hai saaqī

sunā iqbāl-e-isyāñ ḳhalvatoñ meñ vaj.h-e-baḳhshish hai
kalīsāoñ meñ ye tarz-e-ibādat aam hai saaqī

ḳhafā hai madrasa ik sidq-go-e-nāgpūrī se
tirā mai-ḳhvār is māhaul meñ badnām hai saaqī

kitāb-e-sīrat-o-aḳhlāq de insāñ ke hāthoñ meñ
taraqqī dānish-o-ījād kī nākām hai saaqī

rivāj-e-madrasa hai dopahar ke vaqt qailūla
yahāñ shab zinda-dārī mā.il-e-ārām hai saaqī

mire atrāf hai tīra-shabī meñ nuur kā halqa
ki sham-e-rāh maiḳhāne se ghar tak jaam hai saaqī

kahāñ nān-e-javīñ aur roġhan-e-zaitūn-o-shaiḳh-e-dīñ
ra.ūsā ke yahāñ mīlān-e-dāvat aam hai saaqī

kaam maiḳhāne kā ho jā.egā band
chashm-e-sāqī kī hayā achchhī nahīñ

sharāb pī ke maiñ pahuñchā falak pe ai saaqī
kahāñ se un ka.ī qatroñ meñ ye asar aayā

harf aa.e na 'tamannā.ī' kahīñ saaqī par
aaj mahfil meñ chale aa.e haiñ ham jaam ke saath

ḳhudā ne kis shahar andar haman ko laa.e Daalā hai
na dilbar hai na saaqī hai na shīsha hai na pyāla hai

majbūri-e-sāqī bhī ai tishna-labo samjho
vaa.iz kā ye manshā hai mai-ḳhvāroñ meñ chal jaa.e