Tags-Saqi

saaqī haiñ roz-e-nau-bahār yak do sah chaar panj o shash
de mujhe jām-e-ḳhush-gavār yak do sah chaar panj o shash

jo dam meñ dam hai to saaqī kī justujū hī sahī
nahīñ sharāb to saudā-e-ārzū hī sahī

bazm-e-tarab vaqt-e-aish saaqī o naql o sharāb
koī ise kuchh kaho ham to samajhte haiñ ḳhvāb

saaqī ne tujhe tishna hī rakkhā hai 'zahīr' ab
shāyad mai-e-ishrat bhī muqaddar se uḌī hai

ham ne dekhā nahīñ us zarf kā piine vaalā
shīsha kartā hai ye saaqī se gilā mere ba.ad

chashm-e-sāqī asar-e-mai se nahīñ hai gul-rañg
dil mire ḳhuun se labrez hai paimāne kā

ab ise daar pe le jā ke sulā de saaqī
yuuñ bahaknā nahīñ achchhā tire mastāne kā

sab kī nazroñ meñ ho saaqī ye zarūrī hai magar
sab pe saaqī kī nazar ho ye zarūrī to nahīñ

chashm-e-sāqī se piyo yā lab-e-sāġhar se piyo
be-ḳhudī āThoñ pahar ho ye zarūrī to nahīñ

sub.h haiñ sajde meñ ham to shaam saaqī ke huzūr
bandagī apnī jagah aur mai-kashī apnī jagah

terī zid hai yahī agar saaqī
zahr de de magar sharāb na de

mire siine se dil ke TūTne kī kyuuñ sadā aa.ī
magar yaañ haath se saaqī ke shīsha gir paḌā hogā

daañt kis kā hai jaam par saaqī
mai Tapaktī hai abr-e-naisāñ se

vo bhī saaqī mujhe nahīñ detā
vo jo TuuTā paḌā hai jaam ḳharāb

kaif-o-mastī jo tirī āñkhoñ ke ḳhum-ḳhāne meñ hai
vo tirī miinā meñ hai saaqī na paimāne meñ hai

saaqī na pilā.ī tuune āḳhir
tarsā tarsā ke maar Daalā

sub.h aayā sharāb meñ maḳhmūr
niiñd se uTh ke musmusā saaqī

gar tū 'tābāñ' ko mai pilāvegā
tirā ehsāñ na hogā kyā saaqī

lab-e-dariyā pe chāñdnī dekhūñ
ho agar mujh se āshnā saaqī

dard-e-sar hai ḳhumār se mujh ko
jald le kar sharāb aa saaqī