Tags-Satire

sho.aloñ meñ nikharte haiñ jauhar qismat pe 'farīdī' tanz na kar
ġham aisī hī ne.amat hai jis ko paate haiñ yahāñ qismat ke dhanī

apne dukhoñ pe tanz koī khel to na thā
zaḳhmoñ ko phuul kah ga.e ham vaz.a-dār log

merī tar-dāmanī-e-chashm pe yuuñ tanz na kar
maiñ sadaf huuñ tū mirā dil hai guhar kī sūrat

hamīñ meñ kyuuñ hadaf-e-tanz ai jamāl-e-bahār
sabhī ne phuul chune the tirī qabā ke liye

kaliyāñ khilā rahī thī shoḳhī nasīm-āsā
jab tanz ban ga.ī hai talvār ho ga.ī hai

shikva o tanz se bhī kaam nikal jaate haiñ
ġhairat-e-ishq ko lekin ye gavārā bhī to ho

rahne de ye tanz ke nashtar ahl-e-junūñ bebāk nahīñ
kaun hai apne hosh meñ zālim kis kā garebāñ chaak nahīñ

is qadar shiddat nahīñ thī tanz meñ
ghaav gahrā hai na jaane kis liye

fitrat pe ye bhī tanz hai shāyad 'shakeb-ayāz'
pyāsī hai ret aur samundar hai sāmne

sirf afsos hai ye tanz nahīñ
tum na sañvre sañvarne vaale the

ye aañkh tanz na ho zaḳhm-e-dil harā na lage
mujhe qarār to ho yā use hayā na lage

koī ilzām koī tanz koī rusvā.ī
din bahut ho ga.e yāroñ ne ināyat nahīñ kī

zo.am-e-pārsā.ī meñ kab ḳhayāl hai un ko
tanz to vo karte haiñ aa.ina nahīñ rakhte

logo mirī āshufta-sarī par na karo tanz
ilzām utāro koī us zulf ke sar se

mire ḳhulūs ke phūloñ se jo uḌī ḳhushbū
tumhāre tanz kā mausam bhī bad-havās huā

vo ek shoḳh kā andāz-e-guftugū 'tābāñ'
jigar meñ tanz kā nashtar utar utar sā gayā

aap ke tanz sar āñkhoñ pe magar yaad rahe
ye vo nashtar haiñ ke siine meñ utar jaate haiñ

ik tanz hai kaliyoñ kā tabassum bhī magar kyuuñ
maiñ ne to kabhī phuul masal kar nahīñ pheñke

...apne ahd kī saffākī par ye ḳhāmoshī tanz nahīñ
koī to hogā is kā sabab kyuuñ baiThe ho dil-gīr likho

tanz to bahut hue par ajiib baat hai
raah jo hamārī thī rāh-e-ām ho ga.ī