Tags-Satire

surūr-e-ishq kā un ko maza nahīñ ma.alūm
jo log niiñd na aane pe tanz karte haiñ

tujhe ḳhabar hī nahīñ hai ai masḳhare kuchh log
tire mazāq uḌāne pe tanz karte haiñ

ajiib baat hai yaaro har ik zamāne meñ
zamāne vaale zamāne pe tanz karte haiñ

maiñ jān-būjh ke jab in ko chhoḌ detā huuñ
shikār mere nishāne pe tanz karte haiñ

nahīñ hai sher-o-adab se jinheñ lagāv 'zafar'
vo log mere gharāne pe tanz karte haiñ

vaqār-e-ishq baḌhāne pe tanz karte haiñ
kisī ke naaz uThāne pe tanz karte haiñ

mujhe tanz-o-malāmat kī baḌī darkār hai yuuñ bhī
anā ko shaan bhī to chāhiye shamshīr hone tak

sho.abada-bāzī kisī kī na chalegī ham par
tanz o dushnām ko kahte ho latīfa samjheñ

chubho ke tanz ke neze hamārī rag rag meñ
vo shiddat-e-ḳhalish-e-dil talāsh kartā hai

hamāre zabt kī dīvār āhanī na sahī
tumhāre tanz ke neze kahāñ nukīle haiñ

dariyā pe ek tanz samajhiye ki tishnagī
sāhil kī sard ret meñ dafnā ga.ī mujhe

kyuuñ tanz aap karte haiñ mere gunāh par
ye maiñ ne kab kahā hai ki parhez-gār huuñ

koī bhūkā jo fart-e-zo.af se kuchh laḌkhaḌā jaa.e
to duniyā tanz kastī hai use mad-mast kahtī hai

ḳhairiyat pūchhte haiñ log baḌe tanz ke saath
jurm bas ye hai ki ik shoḳh kā ham-sāya huuñ

har taraf tanz ke nashtar haiñ hamārī jānib
kis ke hāthoñ meñ mirā dīn-e-mubīñ aa gayā hai

mehr o vafā o lutf-o-ināyat ek se vāqif in meñ nahīñ
aur to sab kuchh tanz o kināya ramz o ishāra jaane hai

vo jis kī shakl bhī āñkhoñ ko nāgavār huī
usī ke tanz ko dil meñ basā liyā maiñ ne

tafrīq rahne dījiyo tārīf-o-tanz meñ
ab ke sharāb zahr milā kar na dījiyo

tū ise tanz kyuuñ samajhtā hai
maiñ to hālāt kar rahā huuñ bayāñ

ahl-e-nazar hañs hañs kar tujh ko māh-e-kāmil kahte haiñ!
tere dil kā daaġh tujhī par tanz hai aur bharpūr hai chāñd