Tags-Satire

tū mire hāl-e-pareshāñ pe bahut tanz na kar
apne gesū bhī zarā dekh kahāñ tak pahuñche

jis ke kamāl-e-tanz se shahr sarāpā zaḳhm hai
us ko sabhī shikāyateñ mohsin-e-qand-ḳhū se haiñ

hamāre zabt kī dīvār āhanī na sahī
tumhāre tanz ke neze kahāñ nukīle haiñ

ab aa gayā hai to vīrāniyoñ par tanz na kar
tirā makāñ isī ujḌe hue dayār meñ thā

kis tanz se vo farmāte haiñ kyā sahl hai ulfat kī manzil
yaañ jaan gañvānī paḌtī hai yaañ ashk bahānā paḌtā hai

ye niil mujh se kah rahā hai tanz kī zabān meñ
vahāñ pe jā sadā lagā jahāñ tirā asā gayā

shāyad kisī ne buḳhl-e-zamīñ par kiyā hai tanz
gahre samundaroñ se jazīre nikāl kar

dushman ke tanz ko bhī salīqe se Taal de
apne mazāq-e-tab.a kī aisī misāl de

shikasta-dil kī ḳhushī dosto ḳhushī to na thī
hañsī pe vaqt ke ik tanz thā hañsī to na thī

āshufta-mizājī pe mirī tanz na kiije
andāz-e-jahāñ bhī to junūñ-ḳhez bahut hai

tanz dushnām lānat adāvat hasad
in rafīqoñ kā saaya rahā aur maiñ

tanz o ta.ana o tohmat sab hunar haiñ nāseh ke
aap se koī pūchhe ham ne kyā burā.ī kī

siyāh chashm mirī vahshatoñ pe tanz na kar
maiñ qātiloñ se ḳhabar-dār rahnā chāhtā huñ

tanz ke tiir mirī samt chalāte kyuuñ ho
tum agar dost ho to dil ko dikhāte kyuuñ ho

aaj tak tanz-e-mohabbat kā asar baaqī hai
qahqahe gūñjte phirte haiñ bayābānoñ meñ

pheñko na ḳhamoshī pe mirī tanz ke patthar
ab bhī hai mire muñh meñ zabāñ shahr ke logo

qahqaha shab ne lagāyā hai baḌe tanz ke saath
sub.h jab apnī rihā.ī pe bhī rotī aa.ī

zindagī par is se baḌh kar tanz kyā hogā 'farāz'
us kā ye kahnā ki tū shā.er hai dīvānā nahīñ

sher par daad de rahe ho tum
tanz lekin tumhārī vaah meñ haiñ

aap ko maiñ dost samjhā thā 'nazar'
aap bhī ab tanz farmāne lage