Tags-Sawal

nisāb-e-ishq meñ saare savāl mushkil the
mohabbateñ bhī thiiñ darpesh imtihāñ kī tarah

lagā hai 'ābrū' mujh kuuñ 'valī' kā ḳhuub ye misrā
savāl āhista āhista javāb āhista āhista

us ne mirī nigāh ke saare suḳhan samajh liye
phir bhī mirī nigāh meñ ek savāl hai nayā

har ek fard hai yaañ apnī apnī soch meñ gum
javāb ḳhud se gurezāñ savāl pūchhe kyā

savāl-e-ruḳh gulistāñ meñ aayā to phuul Thahrā
laboñ kī hasrat suḳhan meñ pahuñchī to pañkhuḌī thī

ham apnī jāgtī āñkhoñ meñ ḳhvāb le ke chale
vo kyā savāl the jin ke javāb le ke chale

yahāñ zarra zarra hai dīda-var nahīñ zarra bhar koī be-ḳhabar
kisī kam-nazar ko paḌī hai kyā paḌe kyuuñ savāl ke darmiyāñ

do nigāhoñ kā tasādum chand lamhoñ kā savāl
aur rusvā.ī jahāñ meñ umr-bhar kī ho ga.ī

savāl un kā javāb un kā sukūt un kā ḳhitāb un kā
ham un kī anjuman meñ sar na karte ḳham to kyā karte

nañg hai takiyedāroñ kā
pā-e-talab yā dast-e-savāl

hā.e-rī bebasī shauq-e-dil kā ajiib haal hai
us kā javāb sun chukā phir bhī vahī savāl hai

hijr kī shab ghaḌī ghaḌī dil se yahī savāl hai
jis ke ḳhayāl meñ huuñ gum us ko bhī kuchh ḳhayāl hai

chāheñge gar to dil kī baat aap hī jaan leñge vo
muñh se kahūñ to kyā kahūñ shakl mirī savāl hai

bose kī to hai ḳhvāhish par kahiye kyūñki us se
jis kā mizāj lab par harf-e-savāl bāñdhe

kaaT āgāhiyoñ kī fasl magar
zehan meñ kuchh na.e savāl ugā

kin mehnatoñ se vasl pe raazī hue haiñ vo
sau nāma-bar hue jo savāl o javāb meñ

vafā-parastoñ se kyuuñ zid hai us pe sab chup haiñ
savāl ye hai ki is kā javāb hī kyā hai

tujh se māñgūñ maiñ tujhī ko ki sabhī kuchh mil jaa.e
sau savāloñ se yahī ek savāl achchhā hai

charāg hai, kitāb hai savāl hai, javāb hai
ki āsmāñ muñDer hai ki ye zamīñ bhī Dher hai

ik roz zindagī ne kiyā thā koī savāl
kyā jaane kab se DhūñD rahe haiñ javāb log