Tags-Sawal

ġham bhī hai ik parda-e-iz.hār-e-shauq
chhup ke aañsū meñ savāl aa hī gayā

dekho hameñ ki manzil-e-hosh-o-talab meñ haiñ
lekin lab-e-savāl pe taale paḌe hue

savāl maiñ ne bhī rakkhe guzārishoñ kī tarah
badal ke us ne bhī andāz-e-dil-barāna kiyā

maraz ke vāste itnī davā ziyāda hai
mire savāl se terī atā ziyāda hai

ik savāl-e-shauq par us ne hameñ ghāyal kiyā
hashr ke din dekhnā hai kyā ho qātil kā javāb

jur.at-afzā-e-savāl ai zahe andāz-e-javāb
aatī jaatī hai ab is but kī nahīñ haañ ke qarīb

merī jānib se hai ḳhāmosh darīche kā savāl
kab se sīkhā tirī āvāz ne parvā karnā

vo ḳhayāl khol ke dekhnā vo savāl taul ke dekhnā
ki samajh rahe ho jise ḳhafā vo ḳhafā na ho kahīñ yuuñ na ho

saath chalte raho magar ḳhāmosh
is safar meñ savāl Thiik nahīñ

kyā jaane kis liye vo nazar ke savāl par
ham se nazar bachā ke bahut sochte rahe

pūchhā thā maiñ ne jab use kyā mujh se ishq hai?
us ko mire savāl pe hairat nahīñ huī

kyā ab kisī kī aarzū yā justujū kareñ
ab ḳhud se hī savāl kareñ guftugū kareñ

agar tumhārī anā hī kā hai savāl to phir
chalo maiñ haath baḌhātā huuñ dostī ke liye

kitne savāl sab kī nigāhoñ meñ rakh diye
ghar ke sabhī charāġh havāoñ meñ rakh diye

tū ye savāl bhī ab dajla o furāt se pūchh
maiñ kyā batā.ūñ kahāñ luT ga.e haram mere

maut bhī to na mil sakī 'fānī'
kis se puurā huā savāl apnā

vo merī fahm kā letā hai imtihāñ shāyad
ki har savāl se pahle javāb māñge hai

tamām mas.ale nauiyat-e-savāl ke haiñ
javāb hote haiñ saare savāl ke andar

pīr-e-muġhāñ se 'faḳhr' yahī ik savāl hai
auñdhe haiñ aaj jām-o-subū kyuuñ sharāb ke

chāñd sūraj mirī chaukhaT pe ka.ī sadiyoñ se
roz likkhe hue chehre pe savāl aate haiñ