Tags-Sawal

bosa dahan kā us ke na pā.eñge apne lab
dāġhī hai maiñ ne nok zabān-e-savāl kī

ba-roz-e-īd bhī roze ke jaisī hālat hai
amīr-e-shahr se lekin savāl thoḌī hai

hayāt ḳhud hai savāl aur ḳhud javāb apnā
savāl kis se karūñ maiñ javāb kis se luuñ

javāz DhūñDe vo apne shikasta-ḳhvāboñ kā
maiñ us kī āñkhoñ se aise savāl kar aayā

jo chāhiye so māñgiye allāh se 'amīr'
us dar pe aabrū nahīñ jaatī savāl se

kabhī kabhī to ye dil meñ savāl uThtā hai
ki is judā.ī meñ kyā us ne pā liyā hogā

vo log jin kī zabāñ sho.ala-e-tamanna thī
savāl ban ke zamāne kī chashm-e-tar meñ rahe

maiñ to ḳhud meñ kahīñ na thā maujūd
mere lab par savāl kis kā thā

mire savāl vahī TūT-phūT kī zad meñ
javāb un ke vahī haiñ bane-banā.e hue

shab maiñ chāhā karūñ kuchh us se savāl
bin sune hī kiyā javāb shurūa

mehrbāñ jab ho to kartā hai asīrī kā savāl
vo ḳhafā hai jab talak āzād rakkhegā mujhe

mushā.eron maiñ ulaT-palaT ke vo chaar ġhazleñ sunāne vaalo
agar koī pāñchvīñ ġhazal kā savāl kar de to kyā karoge

savāl saḳht thā dariyā ke paar utar jaanā
vo mauj mauj magar ḳhud mirā bikhar jaanā

yaqīn-e-sub.h-e-chaman hai kitnā shu.ūr-e-abr-e-bahār kyā hai
savāl karte haiñ dasht-o-dariyā ki qāfile kā vaqār kyā hai

uljhā thā mere dil meñ jo muddat se ik savāl
lab par jo baar baar thā vo bhī nahīñ rahā

guzre haiñ zindagī meñ aise bhī din 'rishī' par
ḳhud hī savāl karnā ḳhud hī javāb denā

kyuuñ mire lab pe vafāoñ kā savāl aa jaa.e
ain mumkin hai use ḳhud hī ḳhayāl aa jaa.e

be-shak mire savāl ke pīchhe hai aur baat
kyā tere is javāb ke aage kuchh aur hai

savāl āḳhir ye ik din dekhnā ham hī uThā.eñge
na samjhe jo zamīñ ke ġham vo apnā āsmāñ kyuuñ ho

savāl ik be-muravvat se talab aisī ki kyā kahiye
ham apnī zindagī se māñgte haiñ aur sukūñ vo bhī