Tags-Saya

nahīñ saaya sarāpā nuur ya.anī
tazabzub hai vo paikar hai nahīñ hai

us shaam ko jab ruuTh ke meñ ghar se chalā thā
ik saaya bhī bichhḌe hue manzar se chalā thā

ham-rañgī-e-mausam ke talabgār na hote
saaya bhī to qāmat ke barābar nahīñ miltā

galī se terī jo Tuk ho ke aadmī nikle
to us ke saaya se jhaT ban ke ik parī nikle

ġhazab hai ho gayā bargad bhī īñdhan
buzurgoñ kā kahīñ saaya nahīñ hai

pī lī to kuchh pata na chalā vo surūr thā
vo us kā saaya thā ki vahī rashk-e-hūr thā

kis ko ḳhush aatī hamārī chhat kī sāya-afganī
ghar banāyā thā to phir be-ḳhānamāñ honā hī thā

kaise amaañ milegī hameñ tez dhuup se
sūraj ne har daraḳht kā saaya jalā diyā

jism par hai kaun se ifrīt kā saaya savār
bhāgtā hai sar se dhaḌ jaise ki sar kuchh bhī nahīñ

ye soch lo ab āḳhirī saaya hai mohabbat
is dar se uThoge to koī dar na milegā

phir yaad bahut aa.egī zulfoñ kī ghanī shaam
jab dhuup meñ saaya koī sar par na milegā

dil kī dīvāroñ pe ye rañg-e-shab-e-tār to dekh
hādisa chhoḌ gayā hai koī saaya apnā

jism apnā hai koī aur na saaya apnā
jaane is ziist se hai kaun sā rishta apnā

dhuup javānī kā yārāna apnī jagah
thak jaatā hai jism to saaya māñgtā hai

kabhī saaya hai kabhī dhuup muqaddar merā
hotā rahtā hai yuuñ hī qarz barābar merā

dasht ke dhuup ne ham ko ye batāyā 'ḳhāvar'
apne ghar ke dar-o-dīvār kā saaya kyā hai

zor-e-vahshat bhī agar kam ho to chalnā hai mudām
sar chhapāne ke liye dasht meñ saaya hī nahīñ

ik ranj-e-safar kī dhuul mire chehre pe gard-e-malāl huī
ik kaif jo sañgī sāthī thā us kaif kā saaya chhīn liyā

peḌ to saare hī be-barg hue jaate haiñ
dhuup to aa.egī saaya nahīñ aane vaalā

ek saaya saath mere ham-safar ban kar mirā
likh rahā hai phir koī taaza kahānī dhuup meñ