Tags-Saya

koī saaya zindagī kā gar mile
chāk-e-gul ho kar pahan lenā kafan

yahāñ jo aaj shajar sāya-dār hai 'muztar'
yahīñ pe ham bhī kabhī barg-o-bār vaale the

safar zindagī kā rahā is tarah
kaḌī dhuup thī aur saaya nahīñ

shab ke māthe pe koī saaya numūdār huā
us ko ab pyaar ke āñgan kā saverā kahiye

tasavvur fil-haqīqat mo.ajiza hai
kisī kā dil pe saaya paḌ rahā hai

phir koī vus.at-e-āfāq pe saaya Daale
phir kisī aañkh ke nuqte meñ utārā jā.ūñ

vahī muqīm hai jo apne ghar se bāhar hai
ki jitnā saaya hai saarā shajar se bāhar hai

barsoñ se is meñ phal nahīñ aa.e to kyā huā
saaya to ab bhī sahn ke kohna shajar meñ hai

hai gumāñ kyā yaqīn kā saaya
aur yaqīñ vāhime kī shiddat hai

miTTī se huā mansūb magar ātiash-ḳhāna sā jaltā huuñ
ka.ī sūraj mujh meñ Duub ga.e mirā saayā kam karne ke liye

sirf afsos kā saaya hī nahīñ hai ham par
ham ki haiñ ḳhvāb-e-tab-o-tāb ke zindānī bhī

tirī talab kī kaḌī dhuup meñ bhī huuñ lekin
atā ho abr-e-karam peḌ sāya-dār mujhe

sāya-sāñ shauq meñ uftāñ-ḳhezāñ
saath rahtā huuñ jidhar jā.iye aap

din nikalte hī chalā aa.egā vo paas mire
raat se milne gayā hai abhī saaya merā

mere jism kā saaya gar vahāñ pe paḌtā
to jurmāna lagtā

merā saaya hai mire saath jahāñ jā.ūñ maiñ
bebasī tū hī batā ḳhud ko kahāñ pā.ūñ maiñ

sulagte jism pe mere guloñ kā saaya thā
tire vajūd kā vo lams kitnā mahkā thā

jis zamīñ pe merā ghar thā kyā mahal uTThā vahāñ
maiñ jo lauTā huuñ to ḳhāk-e-dar na ham-sāya milā

is jahāñ meñ to apnā saaya bhī
raushnī ho to saath chaltā hai

mere haath pe likkhā kyā hai
umr ke uupar barq kā gahrā saaya kyā hai