Tags-Angdaai

ḳhabar hī nahīñ kaise añgḌā.ī le kar nigāheñ uThā.e ki sāġhar uThā.e
kuchh aisā nasha chhā gayā zindagī par sambhalte sambhalte qadam Dagmagā.e

lekin jab maiñ ne añgḌā.ī se husn pe apne naaz kiyā
mahsūs kiyā ki duniyā ko nārāz kiyā

le uḌā rañg falak jalva-e-ra.anā.ī kā
aks hai qaus-e-quzah meñ tirī añgḌā.ī kā

mehnat kī jab ḳhushbū Tapke parchhā.īñ muskātī hai
thak kar un kī bāñhoñ meñ tab añgḌā.ī muskātī hai

sirf phūloñ meñ nahīñ haiñ tere chehre ke rañg
māh-e-nau bhī tirī Thahrī huī añgḌā.ī hai

āsmāñ le rahā hai añgḌā.ī
titliyoñ ke nagar meñ Dar dekhūñ

ab tak mere gītoñ meñ ummīd bhī thī paspā.ī bhī
maut ke qadmoñ kī aahaT bhī jīvan kī añgḌā.ī bhī

laao in be-kaifiyoñ hī se nikāleñ rāh-e-kaif
vaqt ab legā koī pur-kaif añgḌā.ī to kyā

shāyad vo din pahlā din thā palkeñ bojhal hone kā
mujh ko dekhte hī jab us kī añgḌā.ī sharmā.ī hai

haale meñ maah kā hotā hai chakoroñ ko yaqīñ
kabhī añgḌā.ī jo vo rashk-e-qamar letā hai

shāḳh-e-gul meñ jo nazākat jo lahak aa.ī hai
terī bāhoñ kī lachak hai terī añgḌā.ī hai

ham kyā ḳhaak ġhazal likkheñ jab
añgḌā.ī par pahra hogā

ek añgḌā.ī se saare shahr ko niiñd aa ga.ī
ye tamāshā maiñ ne dekhā baam par hotā huā

us kī añgḌā.ī kā aalam to kabhī dekh ai gul
aur hī husn tirī chāk-garebānī de

luT ga.e ek hī añgḌā.ī meñ aisā bhī huā
umr-bhar phirte rahe ban ke jo hoshiyār bahut

maiñ ne tūfān se pahle kā ishāra dekhā
un kī añgḌā.ī kā jab shoḳh nazāra dekhā

añgḌā.ī ye kis ne lī adā se
kaisī ye kiran fazā meñ phūTī

bistar-e-nik.hat pe ye putlī jo mahv-e-ḳhvāb thī
mast añgḌā.ī ke hāthoñ jaag uThī sharmā ga.ī

dekh kar vo bāñkpan vo husn vo rañgīñ shabāb
dil kī hasrat ne bhī āḳhir lī vo añgḌā.ī ki bas

use sadiyāñ lageñgī niiñd se bedār hone meñ
abhī āġhāz kā mausam hai añgḌā.ī safar meñ hai