Tags-Angdaai

aalam ke har manzar ko kuchh rañg na.e mil jaate haiñ
kirneñ sub.h kī le jaatī haiñ ruup tirī añgḌā.ī kā

shāyad vo din pahlā din thā palkeñ bojhal hone kā
mujh ko dekhte hī jab us kī añgḌā.ī sharmā.ī hai

maiñ zehn pe apne gahrī shikan maiñ sidq meñ apne bhaTkā huā
in bandhanoñ meñ ik añgḌā.ī manzil hai jo koī kaThin to yahī

chhup gayā chāñd to jalvoñ kī tamannā ubhrī
ārzūoñ ne lī añgḌā.ī bahut der ke ba.ad

karb vahshat uljhaneñ aur itnī tanhā.ī ki bas
jaane kyuuñ taqdīr ne lī aisī añgḌā.ī ki bas

jin kī shah-e-rag kā lahū phuul kī añgḌā.ī thā
un ko ab hāl-e-gulistāñ na batāo yaaro

mastī-e-do-ālam ik markaz pe simaT aa.ī
so kar vo uThā kuchh yuuñ letā huā añgḌā.ī

ilāhī kyā ilāqa hai vo jab letā hai añgḌā.ī
mire siine meñ sab zaḳhmoñ ke Tāñke TuuT jaate haiñ

daf.atan dil meñ kisī yaad ne lī añgḌā.ī
is ḳharābe meñ ye dīvār kahāñ se aa.ī

halkī sī is jamāhī se maiñ mutma.in nahīñ
band-e-qabā kā ḳhauf kyā añgḌā.ī chāhiye

jahāñ bhī thā koī fitna taḌap ke jaag uThā
tamām hosh thī mastī meñ terī añgḌā.ī

uTh baiThe añgḌā.ī le kar jo ġhaflat kā matvālā hai
ākāsh ke tevar kahte haiñ, tūfān phir aane vaalā hai

aflāk kī mehrāb hai aa.ī huī añgḌā.ī
be-kaif kuchh āfāq kī a.azā-shikanī se

shāḳh-e-gul jhuum ke gulzār meñ sīdhī jo huī
phir gayā aañkh meñ naqsha tirī añgḌā.ī kā

dard ke be-pāyāñ sahrā meñ duur talak hai sannāTā
zaḳhm-e-dil ne lī añgḌā.ī tum bhī chup aur ham bhī chup

husn ke haath bañdhe to vo zarā der sahī
mujh par ehsāñ tirī aa.ī huī añgḌā.ī kā

aañkh paḌte hī na thā naam shakebā.ī kā
dar-e-mai-ḳhāna thā naqsha tirī añgḌā.ī kā

TūTtī sī rag-e-daurāñ ye taraqqī kī thakan
kisī ma.ashūq-e-sahar-ḳhez kī nīm-añgḌā.ī

ab bhī barsāt kī rātoñ meñ badan TūTtā hai
jaag uThtī haiñ ajab ḳhvāhisheñ añgḌā.ī kī

zindagī uljhe hue ḳhvāb kā ib.hām kabhī
kabhī us shoḳh kī uThtī huī añgḌā.ī hai