Tags-Angdaai

rañg sochoñ ke bikhar jaate haiñ ehsāsāt par
zehn meñ shā.er ke jab letī hai añgḌā.ī ġhazal

husn ke jalve luTā.e tirī ra.anā.ī ne
raaz sab khol diye ek hī añgḌā.ī ne

nashāt-e-qurb ke lamhoñ meñ us kī añgḌā.ī
ubhar ke ḳhāk-e-badan se dhanak dhanak jaa.e

ye kis ne jhuum ke mastī meñ lī hai añgḌā.ī
fusūñ-tarāz hai ye kis kā rañg-e-pairāhan

kabhī añgḌā.ī le kar jab samundar jaag uThtā hai
mire andar purānā ik shanāvar jaag uThtā hai

hadd-e-parvāz-e-jamāl aap kī añgḌā.ī hai
is se aage mire ehsās kī ra.anā.ī hai

dariyā-e-husn aur bhī do haath baḌh gayā
añgḌā.ī us ne nashshe meñ lī jab uThā ke haath

lī fart-e-masarrat se barsāt ne añgḌā.ī
jab chāñd se chehre par kaalī sī ghaTā chhā.ī

mahfil meñ jise ma.alūm nahīñ ehsās kī karvaT kyā shai hai
vo dil kī suunī vaadī meñ ġham kī añgḌā.ī kyā jaane

us hasīñ giitī ke khul kar rah ga.e sab joḌ-band
chand pāgal zarroñ ko aa.ī vo añgḌā.ī ki bas

yuuñ lagā jaise ki bal khā ke dhanak TuuT ga.ī
us ne vaqfa jo liyā naaz se añgḌā.ī meñ

donoñ hāthoñ se lūTtī hai hameñ
kitnī zālim hai terī añgḌā.ī

qaid meñ bas ye koī kah de bahār aa.ī hai
phir to maiñ huuñ mirī zanjīr hai añgḌā.ī hai

jab barq-e-tapāñ lahrā lahrā añgḌā.ī falak par letī ho
us vaqt nasheman kaise bane taz.īn-e-gulistāñ kaun kare

raqs kartī huī aatī hai tire jism kī yaad
terī TuuTī huī añgḌā.ī ġhazal gaatī hai

apne markaz kī taraf mā.il-e-parvāz thā husn
bhūltā hī nahīñ aalam tirī añgḌā.ī kā

ik muddat se ḳhushk paḌā hai vo jharnā añgḌā.ī kā
jaane kis ne bhar dī hai us paikar-e-naġhma-sāz meñ chup

hosh idrāk se begāna banā kar ik baar
koī karvaT hī na badlī tirī añgḌā.ī ne

tū jaan toḌ ke letī hai jab bhī añgḌā.ī
ḳhutūt-e-jism ḳhalā meñ ubharne lagte lagte haiñ

kaun añgḌā.ī le rahā hai 'adam'
do jahāñ laḌkhaḌā.e jaate haiñ