Tags-Angdaai

hisār-e-husn ke haale meñ muñh nazar aayā
milā ke haath jo lī us hasīñ ne añgḌā.ī

añgḌā.ī donoñ haath uThā kar jo us ne lī
par lag ga.e paroñ ne parī ko uḌā diyā

payām-e-zer-e-lab aisā ki kuchh sunā na gayā
ishāra paate hī añgḌā.ī lī rahā na gayā

añgḌā.ī bhī vo lene na paa.e uThā ke haath
dekhā jo mujh ko chhoḌ diye muskurā ke haath

saaz hāthoñ meñ uThāyā tirī añgḌā.ī ne
chūḌiyāñ pahlū badalte hī ġhazal-ḳhvāñ ai dost

mujhe shikva nahīñ tahzīb ke un pāsbānoñ se
na lene dī jinhoñ ne fitrat-e-shā.ir ko añgḌā.ī

ham simaT jaate jo bāñhoñ meñ tirī
terī añgḌā.ī kā dariyā hote

rāt-din añgḌā.iyāñ vo leñ mirī āġhosh meñ
jin hasīnoñ ke liye paidā ye añgḌā.ī huī

nīm-uryāñ kuchh numā.ish husn kī thī vasl meñ
chheḌne ko raat hiila un kī añgḌā.ī huī

ek añgḌā.ī se saare shahr ko niiñd aa ga.ī
ye tamāshā maiñ ne dekhā baam par hotā huā

aate hī javānī ke lī husn ne añgḌā.ī
is samt girī bijlī us samt qazā aa.ī

kyuuñ chamak uThtī hai bijlī baar baar
ai sitamgar le na añgḌā.ī bahut

vo jab sanjīda hote haiñ adā añgḌā.ī letī hai
vo jab ḳhāmosh hote haiñ javānī gungunātī hai

kyuuñ chamak uThtī hai bijlī baar baar
ai sitamgar le na añgḌā.ī bahut

har taraf bāñg-e-jaras bāñg-e-darā bāñg-e-azāñ
sone vaale haiñ ki lete nahīñ añgḌā.ī bhī

kabhī aa.ine se nigāheñ milā kar jo lī hogī bharpūr añgḌā.ī tū ne
to ghabrā ke ḳhud terī añgḌā.iyoñ ne tire husn ko gudgudāyā to hogā

mirī miTTī bhī karnā chāhtī hai mashq-e-parvāz
dikhānā phir use manzar vahī añgḌā.ī vaalā

tum ab 'saulat' kaho kuchh shoḳh ġhazleñ
jo dil ne lī vo añgḌā.ī bahut hai

jis ne ki milā.e the sitāroñ se sitāre
ab tak hai us añgḌā.ī ke lene kī adā yaad

terā manshā tire lahje kī dhanak meñ dekhā
tirī āvāz bhī shāyad tirī añgḌā.ī hai