Tags-Shaam

hamāre sher meñ pinhāñ hai raushnī ġham kī
zarā suno to sar-e-shām ye ziyā degā

shaam ke ba.ad thakī haarī utrī hai kamre meñ
ab ik karvaT sub.h talak so.egī kaalī raat

charāg chāñd shafaq shaam phuul jhiil sabā
churā.īñ sab ne hī kuchh kuchh shabāhateñ terī

ye parinde bhī khetoñ ke mazdūr haiñ
lauT ke apne ghar shaam tak jā.eñge

mauj-e-ḳhūñ mujh se bas ab shaam kī duurī par hai
kitne din aur bachā saktā huuñ shamshīr ko maiñ

log to apne gharoñ meñ band ho kar rah ga.e
mere ḳhuuñ se surḳhī-e-shām-e-vatan dekhegā kaun

tujhe 'kalīm' koī kaise ḳhush-kalām kahe
jo din ko raat batā.e sahar ko shaam kahe

bāġh-o-chaman pesh-e-nazar bazm-e-tarab shām-o-sahar
har-sū ba-kasrat jalva-gar husn-e-butān-e-nāznīñ

sabā ye un se hamārā payām kah denā
ga.e ho jab se yahāñ sub.h o shaam hī na huī

kisī din in añdheroñ meñ charāġhāñ ho hī jā.egā
jalā kar dāġh-e-dil koī ziyā-e-shām-e-ġham ho jā

dukh ke taaq pe shaam Dhale
kis ne diyā jalāyā thā

vatan meñ shām-o-sahar jo hotī hai parvarish shaiḳh o barhaman kī
yatīm-ḳhāna meñ in yatīmoñ ke naam kis ne likhā diye haiñ

āmad-e-sub.h se māyūs nahīñ haiñ lekin
Das na le tīrgī-e-shām-e-ġharībāñ yaaro

jo hogī sub.h to taqsīm ho jā.eñge phir ham
Dhalī hai shaam to ḳhud ko ikaTThā kar rahe haiñ

haath meñ le kar sūraj kā nāranjī album
shaam vo photo kise dikhāne lagtī hai

shām-e-ġham karvaT badaltā hī nahīñ
vaqt bhī ḳhuddār hai tere baġhair

tire sulūk kā ġham sub.h-o-shām kyā karte
zarā sī baat pe jiinā harām kyā karte

nīñd-bharī āñkhoñ se chūmā diye ne sūraj ko aur phir
jaise shaam ko ab nahīñ jalnā khīñch lī is andāz meñ chup