Tags-Shaam

kisī kī sham.eñ sar-e-shām bujh ga.iiñ 'nayyar'
kisī ke shahr meñ lekin abhī dīvālī hai

saare ghar meñ shaam Dhale tak khel vo dhuup aur chhāñv kā
lappe patte kachche āñgan meñ loT lagātī do-pahreñ

maiñ to lauT aatā huuñ har shaam ko ghar meñ lekin
dil kisī raah pe chaltā huā rah jaatā hai

ġhurūr-e-sub.h kyā mujh ko dikhātā
lahū kī shaam meñ maiñ dīdanī thā

'ahsan' kī tabī.at se abhī tum nahīñ vāqif
hai dil se duā-go sahar o shaam tumhārā

sub.h-e-tiflī hai buḌhāpā merā
shām-e-pīrī thī javānī merī

barābar ḳhvāb se chehroñ kī hijrat dekhte rahnā
guzar chukne pe bhī vo shām-e-rahlat dekhte rahnā

ik zarā yūñhī basar kar leñ girāñ-jānī meñ ham
phir tumheñ shām-o-sahar rakkheñge hairānī meñ ham

shaam hote hī jo dahlīz pe aahaT sī huī
mere āñgan se ka.ī ḳhvāb suhāne nikle

husn-o-ishq kī taqdīr ik tazād bāham hai
un kī shaam bhī mahfil apnī sub.h bhī tanhā

ye dil hai mirā yā kisī kuTiyā kā diyā hai
bujhtā hai dam-e-sub.h to jaltā hai sar-e-shām

dil ko bahlā.eñ ki qadmoñ ko sambhāleñ ham log
jab na.e moḌ pe pahuñche haiñ to ye shaam Dhalī

vo murda-dilī shaam se pahle kī adā thī
is vaqt to 'kaifī' kisī maqtal meñ milegā

biitī huī hayāt mohabbat kā tazkira
shām-o-sahar kī yaad hai shām-o-sahar ke ba.ad

tamām umr kī tanhā.iyoñ pe bhārī thī
vo ek shaam tire saath jo guzārī thī

sub.h kaisī hai vahāñ shaam kī rañgat kyā hai
ab tire shahr meñ hālāt kī sūrat kyā hai

jab shām-e-mulāqāt paḌosī ke makāñ se
āvāz koī aa.e to lagtā hai ki tum ho

tujh ko to havāoñ kī zad meñ kuchh raat ga.e tak jalnā hai
ik ham ki tire jalte jalte bastī se charāġh-e-shām chale

ai vādi-e-ġham ye mauj-e-havā ik sāz-e-rāh-e-sapārāñ hai
ruktī huī rau ḳhvāboñ kī koī yā sub.h chale yā shaam chale

'mohsin' na jaane sub.h numūdār hogī kab
ye shām-e-be-charāġh hī taqdīr ho na jaa.e