Tags-Shaam

ek ik mauj ko sone kī qabā detī hai
shaam sūraj ko samundar meñ chhupā detī hai

maz.hab-e-ishq se mansūb ye bāteñ to ḳhārij kī haiñ
shām-e-hijrāñ maiñ kisī taur maiñ shirkat nahīñ karne vaalā

ye dil kyuuñ Duub jaatā hai usī se pūchh lūñgā maiñ
sitāra shām-e-hijrāñ kā idhar bhī aa nikaltā hai

sar-e-shām mujh se tū mil vahāñ jahāñ ujlatoñ kā na ho nishāñ
kahīñ duur tak yuuñ hī saath chal mirā haath haath meñ thaam kar

koī āvārgī-e-shahr se bach hī na sakā
ab parinda bhī kahāñ shaam ko ghar aatā hai

shaam se kuchh bujhā sā rahtā huuñ
dil huā hai charāġh muflis kā

ye roz o shab ye sub.h o shaam ye bastī ye vīrāna
sabhī bedār haiñ insāñ agar bedār ho jaa.e

merī koshish hai ki sheroñ meñ samo duuñ 'mullā'
sub.h kā hosh bhī dīvāngī-e-shām ke saath

maiñ tujhe bhuul chukā huuñ magar ab bhī ai dost
aatī jaatī hai nigāhoñ meñ chamak shaam ke saath

shaam hai aur jaane vaalā din hai mere sāmne
ranj meñ huuñ merā saarā kaam rah jaane ke baad

shahr-e-āzurda-fazā meñ ābgīnoñ ko ba-rū-e-kār laate
shaam kī in ḳhānumāñ vīrāniyoñ meñ sohbat-e-ahbāb hote

us ke ruḳhsār sub.h-e-daraḳhshāñ sahī us kī zulfoñ meñ shām-e-ġharībāñ sahī
dhuup aur chhāñv kī tarah vo ḳhud-nigar sāmne mere aa.e to maiñ kyā karūñ

mere pahlū meñ jo bah nikle tumhāre aañsū
ban ga.e shām-e-mohabbat ke sitāre aañsū

had se baḌhne kī sazā detī hai fitrat sab ko
shaam ko kitnā baḌhā kartā hai saayā dekho

guzar rahe haiñ mirī zindagī ke shaam o sahar
ginūñgā baiThā huā daana daana har saa.at

dostoñ se mulāqāt kī shaam hai
ye sazā kaaT kar apne ghar jā.ūñgā

ai merī maañ mujhe har-pal rahe tumhārā ḳhayāl
tum hī se sub.h mirī merī shaam tum se hai

maiñ kar rahā thā duā kī guzārisheñ us se
so kah ga.ī hai udāsī kī shaam ishq ba-ḳhair

dayār-e-hijr kī suunī udaas galiyoñ meñ
pukārtā hai koī sub.h-o-shām ishq ba-ḳhair

aise phirte haiñ shām-e-tanhā meñ
jaise halkī havā ġhubāre meñ