Tags-Shaam

vo aa.ī shām-e-ġham vaqf-e-balā hone kā vaqt aayā
taḌapne loTne kā dam fanā hone kā vaqt aayā

ham kisī na.e din kā intizār karte haiñ
din purāne sūraj kā shaam baasī baasī hai

yahī shaam kā vaqt thā ghar se nikle ki yaad aa gayā thā
bahut din hue aaj vo sab dobāra bahut yaad aayā

hai zindagī kī shaam nahīñ ham-navā koī
har samt dekhte haiñ ajab bekasī se ham

kū-ba-kū hotā nahīñ yā dar-ba-dar hotā nahīñ
ḳhūn-e-nāhaq kis taraf shām-o-sahar hotā nahīñ

ḳhūn-e-dil hotā rahā ḳhūn-e-jigar hotā rahā
ye tamāshā ishq meñ shām-o-sahar hotā rahā

in kī bātoñ par yaqīñ ham umar bhar karte rahe
intizār-e-shām-e-va.ada umr bhar hotā rahā

shaam hote hī koī sham.a jalā rakhnī thī
jab darīche se havā aatī to dekhā jaatā

ik dāstāñ qadīm hai ik dāstāñ darāz
hai shaam jis kā naam vo kis dāstāñ se hai

jahāñ chāho merā naam likho, jo chāho tum ilzām likho
mujhe ishq ne barsoñ qaid rakhā mujhe, hijr kī gahrī shaam likho

'shafīq' āsār haiñ mashriq kī jānib taaza kirnoñ ke
ye merī shām-e-nau kī chāñdnī ma.alūm hotī hai

kiyā thā din kā va.ada raat ko aayā to kyā shikva
use bhūlā nahīñ kahte jo bhūlā ghar meñ shaam aayā

hai ajiib shahr kī zindagī na safar rahā na qayām hai
kahīñ kārobār sī dopahar kahīñ bad-mizāj sī shaam hai

koī naġhma dhuup ke gaañv sā koī naġhma shaam kī chhāñv sā
zarā in parindoñ se pūchhnā ye kalām kis kā kalām hai

na udaas ho na malāl kar kisī baat kā na ḳhayāl kar
ka.ī saal ba.ad mile haiñ ham tire naam aaj kī shaam hai

sahar-o-shām sar-e-anjuman-e-nāz na ho
jalva-e-husn to hai ishq-e-siyahkār to hai

aap agar yūñhī charāġhoñ ko jalāte hue aa.eñ
ham bhī har shaam na.ī bazm sajāte hue aa.eñ

shām-o-sahar ke manzar gahrī udāsiyoñ ke
parde girā rahe haiñ

na shaam hai na saverā ajab dayār meñ huuñ
maiñ ek arsa-e-be-rañg ke hisār meñ huuñ

'ahmad' vo izn-e-dīd jo detā to ek shaam
ḳhud par guzarne vaalī aziyyat ko dekhtā