Tags-Shaam

'ahmad' vo izn-e-dīd jo detā to ek shaam
ḳhud par guzarne vaalī aziyyat ko dekhtā

ġhair ke hote bhalā ai shām-e-vasl
kyuuñ hamāre rū-ba-rū hone lagī

ġhubār-e-sub.h-o-shām meñ
tujhe to kyā

vo shām-e-sukūt bhī ajab thī
qātil ko pukārnā paḌā thā

'sajjād' bhī malūl hai ki qāfila hai shaam kā
falak pe ek chāñd hai jo āḳhirī sahārā hai

tumhārī furqat meñ merī āñkhoñ se ḳhuuñ ke aañsū Tapak rahe haiñ
sip.har-e-ulfat ke haiñ sitāre ki shām-e-ġham meñ chamak rahe haiñ

maut bilkul qarīb hai shāyad
sub.h ko pahuñchī shaam ko pahuñchī

sab kā anjām ek jaisā hai
sub.h-e-raushan bhī shaam ko pahuñchī

kisī aag meñ jalī tū kisī shaam meñ Dhalī maiñ
nahīñ ruuh to badan meñ so ThiThak ke jā rahī huuñ

shaam kā vaqt thā aur naav thī sāhil ke qarīb
paañv chhūte hī kināre ne kahā bismillāh

vo kareñge vasl kā va.ada vafā
rañg gahre haiñ hamārī shaam ke

havā kis qadar tez hai
ajnabī shaam sañvlā ga.ī

bas ek shaam kā har shaam intizār rahā
magar vo shaam kisī shaam bhī nahīñ aa.ī

yuuñ farāġhat hai har ik kaam se ham ko jaise
ḳhatm hai silsila-e-shām-o-sahar tere ba.ad

kaam yaqīnan hai vahī achchhā jo ki ho apne mauqa.a se
baat kaheñ yā naama likheñ yaaro sub.h se shaam kareñ

tirī talab ne falak pe sab ke safar kā anjām likh diyā hai
kisī ko najm-e-sahar kisī ko sitāra-e-shām likh diyā hai

phone kar hī liyā tumheñ āḳhir
shaam be-kal guzārnā kab tak

ik shaam ye saffāk o bad-andesh jalā de
shāyad ki mujhe shola-e-dar-pesh jalā de

shaam aa.ī hai aur sā.atoñ ke qadam pāniyoñ kī ravānī meñ rukne lage
kaun kahtā hai in bādaloñ se pare āsmāñ par sitāre palaT ā.eñge

ek din yaad ā.ūñgā 'sājid' use umr kī be-karānī meñ maiñ bhī kahīñ
shaam aa.egī aur mere āñgan meñ bhī in daraḳhtoñ ke saa.e palaT ā.eñge