Tags-Shaam

gardish-e-mehr-o-māh bhī gardish-e-jām ban ga.ī
sub.h na laḌkhaḌā.e kyuuñ shaam na jhuum jaa.e kyuuñ

vo dhuup hai āñkhoñ meñ ki jal jaatī hai har shaam
manzar hai dhuāñ koī lab-e-bām nahīñ hai

aa terī maañg meñ is shaam kī surḳhī bhar duuñ
us kī taz.īn se ye husn nikhar jā.egā

ham se kyā pūchhoge sāhab shahr kabhī kā TuuT chukā
shaam kī mailī chādar par hai TukḌe TukḌe phailā sach

sub.h se le kar shaam talak un āñkhoñ ne
apne hī saa.e ko baḌhte dekhā hai

uge jo sub.h kā sūraj to ik machine hai vo
Dhale jo shaam to phir jism kī takān sā hai

aglī shaam
vo mujhe erosion ke ma.abad meñ milī

ek shaam
us ne mujhe apnī panāh-gāh se bāhar nikālā

mai-kade kī taraf chalā zāhid
sub.h kā bhūlā shaam ghar aayā

ai 'ziyā' jaao sitāroñ meñ sahar ko DhūñDo
raat hone lagī ab shaam pe hañste hañste

ghane jañgal meñ jaise shaam utre
koī yuuñ 'ja.afarī' yaad aa rahā hai

kyuuñ chhoḌ deñ na shaam se pahle hī terā shahr
tujh se bichhaḌ ke raat basar kis liye kareñ

kyuuñ tujh ko yaad kar ke gañvā.eñ hasīn shaam
palkoñ ko tere naam pe tar kis liye kareñ

hāthiyoñ kī piiTh par baiThā hai din
shaam se pahle koī manzar na dekh

charāġh-e-sub.h kī afsurdagī nahīñ tanhā
kahīñ qarīb yahīñ āftāb-e-shām bhī hai

kyuuñ be-kār us shaḳhs kā rasta dekhte ho
vo to 'shumār' is shaam nahīñ aane vaalā

kaam ko baiThe haiñ aur sar par aa.ī shaam
lagtā hai ab kaam nahīñ aane vaalā

sub.h kā bhūlā shaam ko vāpas ghar aa.e to ġhanīmat hai
jin galiyoñ meñ jā ke na lauTo un galiyoñ meñ jaao kyuuñ

tum paas ho agar to barābar hai raat din
kuchh sub.h se ġharaz na hameñ shaam se ġharaz

tire hī naam kī simran hai mujh ko aur tasbīh
tū hī hai vird har ik sub.h-o-shām āshiq kā