Tags-Shaam

mas.ale aa kar lipaT jaate haiñ bachchoñ kī tarah
shaam ko jab lauT kar daftar se ghar jaate haiñ log

vo shab guzārne aa.egā mere kūche meñ
havā-e-shām ne dhīre se inkishāf kiyā

ho na hairāñ ki añdhere haiñ ujāloñ kī dalīl
shaam ke ba.ad hī ai dost sahar aa.ī hai

arz-o-samā pe rañg thā kaisā utar gayā
āñdhī chalī to shaam kā chehra utar gayā

dil ke sivā hai kaun sā aisā charāġh shaam
be-nūr ho ke bhī jise raḳhshanda kah sakeñ

'mīr' se bai.at kī hai to 'inshā' miir kī bai.at bhī hai zarūr
shaam ko ro ro sub.h karo ab sub.h ko ro ro shaam karo

shaam ke tiir se zaḳhmī hai 'ḳhurshīd' kā siina
nuur simaT kar surḳh kabūtar ban jaatā hai

tere ḳhayāl se ḳhud ko sochā jagmag diip jale
terī aañkh se ḳhud ko dekhā aur muskā.ī shaam

naināon kī badrī se jhar-jhar motī barseñ
chandarmā ne nazar utārī aur fidā.ī shaam

ḳhushbū kī qindīl jalā.ī aur sajā.ī shaam
shab ne dhīre se dastak dī aur bujhā.ī shaam

birhā aag meñ jal jal kar tan saarā raakh huā
raakh se uTThī ik siskārī aur kurlā.ī shaam

dīvānoñ ne dīvānoñ se pūchhā kaun hai vo
jis ke ishq meñ pāgal rainā aur shaidā.ī shaam

bāñheñ tan kā haar huiiñ sab lamhe bane gulāb
bulbul ne ik giit sunāyā aur shahnā.ī shaam

tere dhyān kā kañgan chhankā Dheroñ saaz baje
terī yaad kā kājal pahnā aur sharmā.ī shaam

shaam ne barf pahan rakkhī thī raushniyāñ bhī ThanDī thiiñ
maiñ is ThanDak se ghabrā kar apnī aag meñ jalne lagā

sham.a sā jab shaam hī se hai gudāz-e-dil 'ravāñ'
sub.h tak kyā jaane kyā hālat tirī ho jā.egī

kisī sub.h-e-firāq meñ mujhe chhoḌ
kisī shaam malāl meñ mujhe mil

tire na aane se dil bhī nahīñ dukhā shāyad
vagarna kyā maiñ sar-e-shām sone vaalā thā

shaam hote hī khulī saḌkoñ kī yaad aatī hai
sochtā roz huuñ maiñ ghar se nahīñ niklūñgā