Tags-Shaam

ġhurūb hote hue sūrajoñ ke paas rahe
udaas shaam kī mānind ham udaas rahe

shaam achchhī hai na sahar achchhī
yaar bhejo koī ḳhabar achchhī

dil-girafta hī sahī bazm sajā lī jaa.e
yād-e-jānāñ se koī shaam na ḳhālī jaa.e

dil kī bastī se sar-e-shām jo uTThā hai dhuāñ
achchhe mausam kā ishāra bhī to ho saktā hai

vo kaun sī sahar thī ki roī na phuul phuul
vo shaam kaun sī thī ki ġham se lahū na thī

shaam sākit shajar-dar-shajar rahguzar rahguzar
aañkh maltī uThī tīrgī kuchh nahīñ kuchh nahīñ

us bazm se uTh kar to qadam hī nahīñ uThtā
ghar sub.h ko pahuñche haiñ kahīñ shaam ke uTThe

ab sub.h o shaam shāyad girye pe rañg aave
rahtā hai kuchh jhamaktā ḳhūnāb chashm-e-tar meñ

ā.inda shaam ko ham royā kuḌhā kareñge
mutlaq asar na dekhā nālīdan-e-sahar meñ

kyā yahī hotī hai shām-e-intizār
āhaTeñ ghabrāhaTeñ parchhā.iyāñ

havā kī zad pe hamārā safar hai kitnī der
charāġh ham kisī shām-e-zavāl hī ke to haiñ

shāḳh se uḌ gayā parind hai dil-e-shām-e-dard-mand
sahn meñ hai malāl sā huzn sā āsmāñ meñ hai

misāl-e-ḳhurshīd jalva-gar hai jigar kā har ek dāġh-e-tābāñ
nazāra kar merī shām-e-ġham kā jo sub.h-e-raushan se kam nahīñ hai

isī ḳhayāl se shāyad hai band vo khiḌkī
ThaThurtī shaam kī us ko kahīñ havā na lage

merī duniyā meñ vahī shām-o-sahar haiñ ab tak
zindagī talḳh bhī hai aur girāñ-bār bhī hai

kis qadar mazbūt nikle tere dīvāne ke haath
shām-e-ġham ko jab nichoḌā sub.h-e-tābāñ kar diyā

ye zard pañkhḌiyāñ jin par ki harf harf huuñ maiñ
havā-e-shām meñ mahkeñ zarā jo tū chāhe

ḳhafā nasīm se kitne haiñ vo ilāhī ḳhair
havā bhī khāne ko shām-o-sahar nahīñ jaate

vo kaun sub.h nahīñ karte shaam kā va.ada
vo shaam kaun sī hai jo mukar nahīñ jaate

us ruḳh o zulf se ki duuñ tashbīh
ḳhūbī-e-sub.h-o-shām kuchh bhī hai