Tags-Shaam

sub.h paḌhtā huuñ shaam paḌhtā huuñ
tū mukammal kitāb kī sī hai

rakh ke shīsha-o-jām sāmne maiñ
shaam hone ke intizār meñ huuñ

shaam parinde lauT aa.e to ham tirī khoj meñ chal nikle
phir jañgal meñ raat huī aur ghar kā rasta bhuul ga.e

āḳhirī baar aayā thā milne koī
hijr mujh ko milā vasl kī shaam meñ

ghaḌiyāñ Duboīñ kis ne sar-e-shām phir yahāñ
do pal sukūn ke jo thakan māñgtī rahī

husn kī aag ġhanīmat hai ki is se pahle
rag-e-ayyām thī ik jū-e-fasurda sar-e-shām

ye surma.ī sī shaam
ragoñ meñ jis kī dauḌtā hai ḳhuuñ shafaq ke lāla-zār kā

chhīnā hai tū ne shaam ke ruḳh se salonā-pan
ab shahr-e-ārzū se ujālā bhī chhīn le

matā-e-vāda sambhāle raho ki aaj bhī shaam
vahāñ se ek nayā intizār le aa.ī

udaas shaam kī yādoñ bharī sulagtī havā
hameñ phir aaj purāne dayār le aa.ī

shaam hote hī mire ghar meñ sahar hotī hai
raat bhī hotī hai par raat nahīñ kartā maiñ

har musāfir talāsh kartā hai
apnī manzil ko shaam se pahle

ab chāñd kā armāñ bhī sar-e-shām nahīñ hai
āñkhoñ ke jharoke bhī shikāyat nahīñ karte

merā chāñd nikalne ko thā
shaam se pahle raat na aa.ī

din javānī kā Dhalā ya.anī huī shaam magar
tum vo sūraj ho ki jis par asar-e-shām nahīñ

tīrgī vaqt kī simTī huī ik ḳhaal meñ hai
zehn ik haal meñ hai sub.h nahīñ shaam nahīñ

aaj to jaane kī zid chhoḌo
aaj to shaam suhānī kar do

ye āḳhirī saa.at shaam kī hai
ye shaam bhī tere naam kī hai

patjhaḌ kī havā barfīlī hai
is shaam kī rañgat piilī hai

is shaam ufuq ke hoñToñ par
jo laalī hai zahrīlī hai