Tags-Shaam

vo havā-ḳhvāh-e-nasīm-e-zulf huuñ maiñ tīra-baḳht
kyuuñ na marqad par kare dūd-e-charāġh-e-shām raqs

kaise tai hogī ye manzil-e-shām-e-ġham kis tarah se ho dil kī kahānī raqam
ik hathelī meñ dil ik hathelī meñ jaañ ab kahāñ kā ye sūd-o-ziyāñ dosto

dil nā-umīd to nahīñ nākām hī to hai
lambī hai ġham kī shaam magar shaam hī to hai

sub.h tak maiñ sochtā huuñ shaam se
jī rahā hai kaun mere naam se

had-e-ufuq pe shaam thī ḳheme meñ muntazir
aañsū kā ik pahāḌ sā haa.il nazar meñ thā

pichhlā pahar hai shab kā ki hai shaam kā samāñ
vo kyā batā sakeñge jo ik niiñd so liye

har-sū jahāñ meñ shaam o sahar DhūñDte haiñ ham
jo dil meñ ghar kare vo nazar DhūñDte haiñ ham

aaj ghar ke ā.īne meñ sub.h se ik shaḳhs hai
aur khiḌkī meñ sitāre shaam se pechīda haiñ

rahguzar kahtī hai jaag ai māhtāb-e-shām-e-yār
ham sar-e-bāzār chalte haiñ magar ḳhvābīda haiñ

jaltā hai roz shaam ko ghāTī ke us taraf
din kā charāġh jhiil ke andar paḌā huā

pare karo na abhī gesuoñ ko aariz se
ye shaam qurb-e-sahar meñ rahe to achchhā hai

itnī to us ne kī mirī dil-soziyoñ kī qadr
turbat pe ik charāġh sar-e-shām rakh diyā

shaam hotī hai to ik ajnabī dastak ke sivā
dil se pahroñ koī āvāz ubhartī bhī nahīñ

koī taara na dikhā shaam kī vīrānī meñ
yaad aa.egā bahut be-sar-o-sāmānī meñ

kaisā ye din hai jo nahīñ laatā hai rū-ba-shām
kaisī ye shab hai jis kī sahar nā-padīd hai

shikva kyā kiije shām-e-ġhurbat kā
apnī shāmat ke maare marte haiñ

kahīñ din Dhalā kahīñ shab huī kahīñ shaam aa.ī sahar ga.ī
kisī bevafā kī talāsh meñ mirī umr yuuñ hī guzar ga.ī

udaas shaam se baiThe haiñ chāragar saare
zarūr hai tire bīmār-e-ġham pe bhārī raat

ajab haiñ vo ruḳh o gesū ki sāmne jin ke
ye sub.h o shaam kī jādūgarī nahīñ koī shai

saath sāhil pe guzarte hue dekhī thī kabhī
yaad hai ab bhī samundar meñ utartī huī shaam