Tags-Shaam

kaTī shām-e-furqat 'azīz' aah kyūñ-kar
zarā ā.īna sub.h-dam dekhnā thā

us se kahnā kabhī vo bhī to sar-e-shām 'ravish'
merī palkoñ pe sitāroñ ko utartā dekhe

zamāna hai ki mujhe roz shaam Dastā hai
magar ye dil hai ki pahle se aur hañstā hai

mire baare meñ vo kyā sochtā hai muuD kaisā hai
ab us se shaam ko bhī mil ke andāza nahīñ hotā

kabhī baiThak tirī dopahar meñ ābād rahtī thī
khulā ab shaam ko bhī ghar kā darvāza nahīñ hotā

tumhāre shahr kā mausam baḌā suhānā lage
maiñ ek shaam churā luuñ agar burā na lage

ye rū-e-daraḳhshāñ ye zulfoñ ke saa.e
ye hañgāma-e-sub.h-o-shām allāh allāh

dekho ye shahr hai ajab dil bhī nahīñ hai kam ġhazab
shaam ko ghar jo aa.uuñ maiñ thoḌā sā saj liyā karo

vo mujhe chhoḌ ke ik shaam ga.e the 'nāsir'
zindagī apnī usī shaam se aage na baḌhī

vo ga.e ghar ke charāġhoñ ko bujhā kar mere
phir mulāqāt mirī shaam se aage na baḌhī

din meñ sābit thā aur sālim bhī
shaam hote bikhar gayā maiñ bhī

bhīgī huī ik shaam kī dahlīz pe baiThe
ham dil ke sulagne kā sabab soch rahe haiñ

jise maiñ ne sub.h samajh liyā kahīñ ye bhī shām-e-alam na ho
mire sar kī aap ne khaa.ī jo kahīñ ye bhī jhūTī qasam na ho

bām-o-dar par hai musallat aaj bhī shām-e-alam
yuuñ to in galiyoñ se ḳhurshīd-e-sahar bhī ho gayā

shaam panchhī kahāñ guzāreñge
shāḳh-e-gul par jale basere haiñ

jab shaam baḌhī raat kā chāqū nikal aayā
is biich tirī yaad kā pahlū nikal aayā

raat se din kā vo jo rishta thī
shaam thī aur kaisī tanhā thī

shaam hone vaalī thī jab vo mujh se bichhḌā thā zindagī kī rāhoñ meñ
sub.h jab maiñ jaagā thā vo jo mujh se bichhḌā thā so rahā thā bāhoñ meñ

yahī sub.h aur shaam tak gar amal hai
amal terī zulfoñ kā tā-shām hogā

ye do ik balā haiñ giraftār un kā
koī sub.h hogā koī shaam hogā