Tags-Shaam

jañgal meñ huī hai shaam ham ko
bastī se chale the muñh-añdhere

sub.h tak jaane kahāñ mujh ko uḌā kar le jaa.e
ek āñdhī jo sar-e-shām chalī hai mujh meñ

vo sub.h-o-shām kī rañgīniyāñ tamām huiiñ
sa.ūbatoñ kī kaḌī dhuup hai jahāñ guzre

kyuuñ shaam ko bāhoñ meñ ulajhne kī havas hai
kyuuñ sub.h kī palkoñ meñ koī ḳhvāb chhupā hai

shām-e-visāl ḳhāna-e-ġhurbat se ruuTh kar
tum kyā ga.e nasīb hamāre chale ga.e

sub.h se le kar shaam talak yaañ ye vo galī hai jis meñ phireñ haiñ
chāk-girebāñ mu-e-pareshāñ ham se hazāroñ āshiq-e-rusvā

dekh tū kis qadar bhalā dukh hai
shaam hote hī aa gayā dukh hai

kuchh hasīn tasvīreñ rah ga.iiñ nigāhoñ meñ
varna kyā guzar paatī shām-e-zindagī apnī

maiñ dekhtā huuñ sar-e-shām āsmān ko yuuñ
ki jaise duur ufuq se tū aane vaalā ho

lo saath de chukī shab-e-hijrāñ kā zindagī
ab shām-e-ġham ko saath liye jā rahā huuñ maiñ

shām-e-ġharībāñ tum ne to dekhī nahīñ kabhī
bas is ḳhayāl se hī tumheñ dukh sunā.e haiñ

sar-e-jāñ ye kyuuñ faqat ek shaam Thahar ga.ī
shab-o-roz the mah-o-sāl the vo kahāñ ga.e

agar dil ko bachātā maiñ na zulfoñ ke aḌañge se
to duniyā bhar se lambī shām-e-furqat aur ho jaatī

chhup gayā ḳhurshīd-e-tābāñ aa.ī dīvālī kī shaam
har taraf jashn-e-charāġhāñ kā hai kaisā ehtimām

ḳhūbiyāñ dekhiye muqaddar kī
ho ga.ī shaam to sahar na huī

suniye payām-e-shams-o-qamar raqs kījiye
is dā.ere meñ shām-o-sahar raqs kījiye

dāman meñ har sahar ke jo manzar hai shaam kā
naqshe jahāñ ke aise to dekhe kabhī na the

phūloñ kī tāzgī meñ udāsī hai shaam kī
saa.e ġhamoñ ke itne to gahre kabhī na the

farq-e-tābāñ hai tirā matl.a-e-ḳhurshīd magar
tere kākul meñ chhupī shām-e-qayāmat hai miyāñ

bahut dinoñ se zamīn apne madār par bhī nahīñ hai lekin
abhī vahī shaam chhā rahī hai abhī vahī din nikal rahā hai