Tags-Shaam

patjhaḌ kī havā barfīlī hai
is shaam kī rañgat piilī hai

har shaam zindagī kā nayā ḳhvāb le ke aa.e
har sub.h apnī maut kā manzar dikhā.ī de

gardish-e-charḳh nahīñ kam bhī hanDole se ki mahr
shaam ko maah se ūñchā hai sahar hai nīchā

usī kī raushnī kaam aa.ī umr-bhar apne
jo ik sitāra faqat shām-bhar hamārā huā

koī to sarhad-e-ḳhāmosh toḌ saktā thā
sukūt-e-shām yahāñ tah-ba-tah utartī hai

qalb par jis ke numāyāñ nuur o zulmat kā nizām
munkashif jis kī farāsat par mizāj-e-sub.h-o-shām

ḳhāmushī aur ḳhāmushī meñ sansanāhaT kī sadā
shaam kī ḳhunkī se goyā din kī garmī kā gilā

sub.h se chalte chalte āḳhir shaam huī āvāra-e-dil
ab maiñ kis manzil meñ pahuñchā ab ghar kitnī duur rahā

yaad aatī hai achchhī sī koī baat sar-e-shām
phir sub.h talak sochte rahte haiñ vo kyā thī

sub.h-e-gul ho ki shām-e-mai-ḳhāna
mad.h us rū-e-nāznīñ kī hai

phir ek shaam pazīrā.ī chashm-e-tar kī huī
phir ek shaam guzārī ga.ī janāb ke saath

ba-vaqt-e-shām samundar meñ gir gayā sūraj
tamām din kī thakan se niDhāl aisā thā

apne mehvar pe shaam tak sūraj
kitne hī zāviye badaltā hai

guzre hue din kā ho agar zikr 'sadaf'
guzrī hai jo ik shaam suhānī likhnā

sūraj thā vo to shaam se pahle hī Dhal gayā
niile ufuq pe aur bhī haiñ be-shumār chāñd

kab mahkegī fasl-e-gul kab bahkegā mai-ḳhāna
kab sub.h-e-suḳhan hogī kab shām-e-nazar hogī

ho nahīñ saktā tirī is ''ḳhush-mazāqī'' kā javāb
shaam kā dilkash samāñ aur tere hāthoñ meñ kitāb

mire tasavvur ke rāstoñ meñ ubhar ke Duubī hazār aahaT
na jaane shām-e-alam se mil kar kahāñ saverā palaT gayā hai

shaam ke vaqt to koThe pe jo aatā hai kabhī
dekh kar tujh ko ye ḳhurshed chhupā jaatā hai

raste meñ shaam ho ga.ī qissa tamām ho chukā
jo kuchh bhī thā ai zindagī vo tere naam ho chukā