Tags-Shaam

mujh ko ḳhayāl-e-roz-o-shab ḳhaak rahe mazār meñ
aisī jagah huuñ jis jagah shaam nahīñ sahar nahīñ

roz shab uThte baiThte un kī zabān par nahīñ
koī nahīñ kī had nahīñ shaam nahīñ sahar nahīñ

vo din kahāñ ki us ko sar-e-shām dekh luuñ
pichhle pahar kā chāñd muqaddar lagā mujhe

kab shaam Dhal ga.ī 'duā' aur raat aa ga.ī
ab tīrgī savāl thī aur maiñ safar meñ thī

aisī hī ek shaam thī jab vo chalā gayā
bas ġham se maiñ niDhāl thī aur maiñ safar meñ thī

ik rāsta tavīl thā rim-jhim kā thā samāñ
vo shaam be-misāl thī aur maiñ safar meñ thī

ḳhud apne shaam o sahar meñ ulajh gayā aisā
maiñ āsmāñ huuñ magar apnī gardishoñ meñ huuñ

be-samt-o-be-ḳhayāl thī aur maiñ safar meñ thī
vo shaam pur-malāl thī aur maiñ safar meñ thī

sadma-e-shām-e-ajal mujh ko na bilkul pahuñche
gar mirī daad ko kal tak bhī vo kākul pahuñche

maiñ apne aap ko bhī dekhne se qāsir huuñ
ye shām-e-hijr mujhe kyā dikhānā chāhtī hai

yūñhī aatī jā.egī shām-e-visāl
yūñhī sham-e-bazm jaltī jā.egī

shaam yādoñ se mo.attar hai munavvar hai 'zafar'
aaj ḳhushbū ke vazū se dast o pā raushan kareñ

qāmat pe apnī naaz kare koh-e-shām-e-ġham
ghabrā ke aaj marsiya-ḳhvānī kareñge ham

aaj bhī sūraj ke bujhte hī halkī gahrī shaam huī
aaj bhī ham ne tanhā ghar meñ añgāre dahkā.e haiñ

saare jahāñ kī shām-e-ġham sub.h-e-bahār ban ga.ī
merī sahar kā mas.ala aaj bhī zer-e-ġhaur hai

kaun sī shab be-nāla-o-zārī maiñ ne nahīñ kī us bin sub.h
kaun sā din be-rañj-o-musībat meñ na ro ro shaam kiyā

sukūt-e-shām se ghabrā na jaa.e āḳhir tū
mire dayār se guzrī jo ai kiran phir tū

udāsiyāñ sahar-o-shām kī nahīñ achchhī
'jigar' ye ḳhū dil-e-nākām kī nahīñ achchhī

vo mire dil kī raushnī vo mire daaġh le ga.ī
aisī chalī havā-e-shām saare charāġh le ga.ī