Tags-Shaam

sub.h ye fikr ki ho jaa.e shaam
shaam ko ye ki sahar ho jaa.e

thī shaam zahr-e-rañg meñ Duubī huī khaḌī
phir ik zarā sī der meñ manzar badal gayā

vo āftāb jo dil meñ dahak rahā thā 'sa.ūd'
use sapurd-e-shafaq aaj shaam maiñ ne kiyā

ālam-e-pīrī meñ hai dāġh-e-javānī kā faroġh
ye charāġh-e-shām ḳhurshīd-e-sahar hone ko hai

nikle haiñ sar-e-shām liye mash.al-e-fan ham
nazdīk koī kāġhzī mahtāb na aa.e

dhuup merī saarī rañgīnī uḌā le jā.egī
shaam tak maiñ dāstāñ se vāqi.a ho jā.ūñgī

garm hai hañgāma-e-shām-o-sahar mere liye
raat din gardish meñ haiñ shams o qamar mere liye

khel hai bāzīcha-e-shām-o-sahar mere liye
do gul-e-bāzī haiñ ye shams o qamar mere liye

sub.h tak jaane kahāñ mujh ko uḌā kar le jaa.e
ek āñdhī jo sar-e-shām chalī hai mujh meñ

sub.h karnā shām-e-ġham kā al-amāñ
sham.a ko dāñtoñ pasīna aa gayā

ham ne ashkoñ se tirā naam likhā paanī par
yuuñ jalāyā hai sar-e-shām diyā paanī par

'qamar' ye shām-e-firāq aur iztirāb-e-sahar
abhī to chār-pahar tak sahar nahīñ hotī

rāste meñ
shaam mil jā.egī tanhā

guzar ga.ī jo ghaḌī lauT kar na aa.ī kabhī
talāsh-e-shām-o-sahar baar baar karte rahe

kabhī to nasl-o-vatan-parastī kī tīrgī ko shikast hogī
kabhī to shām-e-alam miTegī kabhī to sub.h-e-ḳhushī milegī

maiñ chāñd bhej rahā huuñ ki tum ko dekh aa.e
tumhāre shahr meñ ab shaam ho ga.ī hogī

jab raushnī na pā sake mehr-o-qamar se ham
ḳhud be-niyāz ho ga.e shām-o-sahar se ham

maiñ tamām din kā thakā huā tū tamām shab kā jagā huā
zarā Thahar jā isī moḌ par tere saath shaam guzār luuñ

din bhar kī 'atash' dhuup ko dāman meñ sameTe
maiñ shaam ke sūraj kī tarah Duub rahā huuñ

dhīre dhīre Dhalte sūraj kā safar merā bhī hai
shaam batlātī hai mujh ko ek ghar merā bhī hai