Tags-Shaam

gesū-o-ruḳh ko jab se chāhā tab se merā rañg ye hai
shaam achchhā to sub.h burā aur sub.h achchhā to shaam burā

ghaḌiyāñ kāñdhoñ pe rakhe ye mire peḌ se log
sub.h se shaam talak dhuup ko Dho.e jaa.eñ

musāfir raah meñ hai shaam gahrī hotī jaatī hai
sulagtā hai tirī yādoñ kā ban āhista āhista

shaam Dhale jab bastī vaale lauT ke ghar ko aate haiñ
aahaT aahaT dastak dastak kyā kyā ham ghabrāte haiñ

chalā dhīme dhīme se kachhve kī chaal
pahuñchte pahuñchte use ġhaar tak shaam hone lagī

ham saath chale the sūraj ke so is kā ye ḳhamyāza hai
sūraj to nikal kar duur gayā ab apnī shaam ġhubār huī

har sub.h ek ma.arka-e-karbalā sahī
har shaam apne dostoñ meñ surḳh-rū huuñ maiñ

chaTak rahī hai kisī yaad kī kalī dil meñ
nazar meñ raqs-e-bahārāñ kī sub.h-o-shām liye

jān-e-hazīñ nikaltī shām-e-firāq kyuuñ kar
vo raat thī añdherī rasta na sūjhtā thā

ham nā-murād-e-ishq vo hijrāñ-nasīb haiñ
dekhā na ham ne muñh kabhī shām-e-visāl kā

azal se bhāgtā huuñ apne hī saa.e ke pīchhe
ta.āqub meñ mire shām-o-sahar rakkhe ga.e haiñ

tum to ai mehrbān anūThe nikle
jab aan ke paas baiThe rūThe nikle

tujhe ḳhabar hī nahīñ hai ki ham visāl kī faal
kabhī sahar se kabhī shaam se nikālte haiñ

maiñ rab ke nuur se mahv-e-kalām huuñ sar-e-shām
sū-e-charāġh-e-duā tū bhī darmiyāñ se nikal

rusvā kareñge tujh kuuñ jagat meñ nihāl-e-ashk
añjhuvāñ kuuñ dasht aur saf-e-mizhgāñ ko shaam jaan

fazāoñ kī rañgat nikharne lagī hai
huī shaam phir dil meñ lauTī udāsī

raqs
shaam khaḌī hai

gorā mukhḌā kaalī zulfeñ
sub.h ke dar par shaam kī chilman

siyah rūmāl gorī gorī gardan meñ lapeTā hai
gale milvā diyā shām-e-sahar ko kyā tamāshā hai