Tags-Shaam

ab aas TuuT kar mujhe sukūñ nasīb ho gayā
jo shām-e-intizār thī vo shaam to guzar ga.ī

mehmān-e-jahāñ the ek shab ke
shaam aa.e the aur sahar ga.e ham

shaam ko aaoge tum achchhā abhī hotī hai shaam
gesuoñ ko khol do sūraj chhupāne ke liye

shaam Dhale ik lawn meñ saare baiTh ke chaa.e piite the
mez hamārā ghar kā thā kursī sarkārī hotī thī

phuul khilte the 'tālib' ḳhushbū raqs kartī thī
aaj sho.ale raqsāñ haiñ shāḳh-e-shām-e-gulshan meñ

ham ahl-e-nazāra shām-o-sahar āñkhoñ ko fidya karte haiñ
ham jalva jalva kahte haiñ vo parda parda karte haiñ

vo dil apnā bahlāte haiñ is shām-o-sahar ke khel meñ ham
har sub.h dabāte haiñ jazbe har shaam vo fitna karte haiñ

mardum-e-dīda-e-tar mardum-e-ābī haiñ magar
rahte haiñ roz o shab o shām-o-sahar paanī meñ

tum hisār-e-vaqt meñ sūraj bane baiThe rahe
aur gardish ke liye ḳhud sub.h o shaam aate rahe

dekho gul-e-ahār-e-asar dasht-e-shām meñ
dīvār-o-dar koī bhī kahīñ pesh-o-pas nahīñ

dukh-bharī shaam ke neze pe sisakte hue log
zarre zarre se Tapaktī man-o-tū kī sūrat

gardish-e-mehr-o-māh bhī gardish-e-jām ban ga.ī
sub.h na laḌkhaḌā.e kyuuñ shaam na jhuum jaa.e kyuuñ

hisār-e-shām-o-sahar aur zabt-e-ahl-e-nafas
nizām-e-jabr meñ bebas ye mard-o-zan kaise

phir aaj shaam se hī zehn ko farāġhat hai
phir aaj shab vahī yādoñ kā silsila hogā

barf apne-āp ghul jaatī hai sūraj ho na ho
shaam se pahle ye jaanā thā magar samjhā na thā

ye eden garden hamdam nigāh-o-dil kī jannat hai
yahāñ havvā kī rañgīñ beTiyāñ har shaam aatī haiñ

pukārtī haiñ bhare shahr kī guzargāheñ
vo roz shaam ko tanhā dikhā.ī detā hai

ik dhuup se uljhā huā saaya hai ki maiñ huuñ
ik shaam ke hone kā bharosa hai ki tum ho

bain kartī huī chaltī hai havā kyuuñ sar-e-shām
dil kā maarā koī rātoñ ko sisaktā kyā hai

ik be-yaqīn raat mirī raat kī sharīk
ik be-dayār shaam dil-e-nā-rasā ke saath