Tags-Shaam

bahut udaas hai ab rañg-e-mahfil-e-hastī
jabīñ se sub.h to zulfoñ se shaam paidā kar

hairāñ huuñ tire hijr meñ kis tarah se pyāre
shab roz ko aur sub.h ke ta.iiñ shaam karūñ maiñ

rahtā huuñ ujāloñ ke añdheroñ ke safar meñ
ye kis ne mujhe baañT diyā shām-o-sahar meñ

shām-e-ġham karvaT badaltā hī nahīñ
vaqt bhī ḳhuddār hai tere baġhair

yuuñ tasavvur meñ dabe paañv tirī yaad aa.ī
jis tarah shaam kī bāñhoñ meñ sitāre aa.e

aag barsāte hue din kī hadeñ bāñdh kabhī
garm shāmoñ meñ koī shaam suhānī de jā

dil kā ek Thikānā hai par apnā kyā
shaam jahāñ hotī hai vahīñ paḌ jaate haiñ

koī aise vaqt meñ ham se bichhḌā hai
shaam Dhale jab panchhī ghar lauT aate haiñ

shaam aa.ī hai liye haath meñ yādoñ ke charāġh
vo tire saath guzāre hue lamhoñ ke charāġh

jarāhat-e-vasl ne khilā.e haiñ zulmat-e-shām meñ sitāre
matā-e-hijrāñ kī chāñdnī se bharā huā hai ayāġh merā

milne mujhe bhī aa.ī thī ik shām-e-zindagī
mujh se lipaT ke roī thī lāchār dekh kar

aish jāved un ko hāsil hai jo haiñ terī taraf
tā.er-e-qibla-numā kartā hai sub.h-o-shām raqs

ablaq-e-chashm-e-butāñ kī shoḳhiyāñ chakrā ga.iiñ
āsmāñ par mehr-o-mah karte haiñ sub.h-o-shām raqs

'riyāz' shaam Dhalī ab to ghar ko lauT chalo
tulū-e-sub.h se pahle ke nikle ho ghar se

sabāh-e-daulat-e-taimūriya kī aa.ī thī shaam
paḌā thā nayyar-e-iqbāl-e-hind sar-ba-sujūd

tirā charāġh sar-e-shām bujh gayā lekin
sahar ke bhes meñ phaileñgī us kī tanvīreñ

shaam hote hī charāġhoñ ko bujhā detā huuñ
dil hī kaafī hai tirī yaad meñ jalne ke liye

mujhe vahāñ se udāsī bulā rahī thī aaj
jahāñ se shām-o-sahar koī dekhtā thā mujhe

shām-e-hijrāñ kisī sūrat se nahīñ hotī sub.h
muñh chhupā kar maiñ añdhere meñ nikal jā.ūñgā

ye suḳhan jo ham ne raqam kiye ye haiñ sab varaq tirī yaad ke
koī lamha sub.h-e-visāl kā koī shām-e-hijr kī muddateñ