Tags-Shaam

zulf kī shaam sub.h chehre kī
yahī mausam janāb de diije

hāfiza ek amānat hai kisī kī lekin
yaad kī sard havā shaam ko royā na kare

unhīñ gharoñ se ibārat hai apnī shām-e-jahāñ
charāġh-e-tāq bhī aksar jalā na kartā thā

shaam ke saa.e meñ jaise peḌ kā saayā mile
mere miTne kā tamāshā dekhne kī chiiz thī

phir koī shām-e-shafaq-dīdā bhī utrī ki nahīñ
merī tanhā.ī kā kyā rañg huā mere ba.ad

bujh gayā phir shaam ke sahrā meñ sūraj kā ḳhayāl
phir mah-o-anjum ko jī uThne kī rusvā.ī milī

din bhar jo sūraj ke Dar se galiyoñ meñ chhup rahte haiñ
shaam aate hī āñkhoñ meñ vo rañg purāne aa jaate haiñ

ba-vaqt-e-shām ikaTThe Dūbte haiñ
dil aur sūraj meñ yārāna bahut hai

ye sub.h-o-shām kī yūrish ye mausamoñ kī ravish
ki jaise mere ta.āqub meñ aa rahā hai koī

ek hī pal ko Thaharnā thā muñDeroñ pe tirī
shaam kī dhuup huuñ maiñ kaash ye jaanā hotā

tumhāre hijr kā anjām ḳhūbsūrat hai
bahut udaas magar shaam ḳhūbsūrat hai

sardiyoñ kī dopahar se dhuup le jā.egā vo
garmiyoñ kī shaam se ThanDī havā le jā.egā

raakh alaav kī ye bikhrī huī jañgal kī ye shaam
kyā zamāne ga.e kyā log zamāne se ga.e

maiñ dhānī shaam kā ruup bhī maiñ sub.h kī komal dhuup
mujhe dekh ke koyal gaa.e to har paat bajā.e saaz

shaam se ye thī tire bīmār kī hālat ki log
raat bhar uTh uTh ke āsār-e-sahar dekhā kiye

udaas shaam kī yādoñ bharī sulagtī havā
hameñ phir aaj purāne dayār le aa.ī

ġham meñ rotā huuñ tire sub.h kahīñ shaam kahīñ
chāhne vaale ko hotā bhī hai ārām kahīñ

hai ḳhudā hī 'qalaq' jo aaj bujhe
sub.h hote nahīñ ki shaam nahīñ

roz-e-furqat ko roz-e-hashr na jaan
shaam par bhī to iḳhtitām nahīñ

koī nahīñ thā magar sāhil-e-tamannā par
havā-e-shām meñ jab rañg-e-indimāl aayā