Tags-Shaam

shab se sahar se shaam se pichhle pahar se duur
har justujū hai jaise guzar se basar se duur

un ke jalve sahar-o-shām tak aa pahuñche haiñ
mere āġhāz ab anjām tak aa pahuñche haiñ

sukūt-e-shām se pahle kī manzil saḳht hotī hai
kaho logoñ se sūraj ko na yuuñ Dhaltā huā dekheñ

dhuup kachchī shaam tanhā aur añdheroñ kā hujūm
un meñ apnā aks dikhlātī chalī pāgal havā

mar mar ke agar shaam to ro ro ke sahar kī
yuuñ zindagī ham ne tirī duurī meñ basar kī

sūrat vo bhalī ki ho magar māh-e-tamām
sīrat vo burī ki ho magar vālī-e-shām

jā.egī na dil se tire aariz kī mohabbat
zulfoñ kā tasavvur mujhe har shaam rahegā

ye kyā ḳhabar thī ki shām-e-furqat mire liye sāzgār hogī
vo māh-o-anjum kī aaḌ le kar mire fasāne sunā kareñge

ham se bhī do bāteñ kar le kaisī bhīgī shaam hai chāñd
sab kuchh sun le aap na bole terā ḳhuub nizām hai chāñd

tujh ko to har shaam falak par ghaTtā-baḌhtā dekhte haiñ
us ko dekh ke iid kareñge apnā aur islām hai chāñd

us ke dhyān kī dil meñ pyaas jagā lī jaa.e
ek bhī shaam na phir us ke naam se ḳhālī jaa.e

sahar se dair o haram par jo bahas karte haiñ
vo mai-kade meñ sar-e-shām ham-kanār mile

mizha ke ashk tamannā ke zaḳhm yaad ke phuul
ka.ī charāġh sar-e-shām-e-intizār mile

tāq-e-mizha pe zau-fishāñ misl-e-charāġh-o-kahkashāñ
us kī galī kī sub.h bhī us kī galī kī shaam bhī

shaam sajā ke kyā kareñ yaad kā ehtimām bhī
bhuul ga.e haiñ ab to ham us kā bhalā sā naam bhī

us ne kivāḌ khol kar yuuñ hī galī meñ kī nigāh
rahravoñ ke darmiyān Thair ga.ī hai shaam bhī

dil meñ uThtī hai masarrat kī lahar holī meñ
mastiyāñ jhūmtī haiñ shām-o-sahar holī meñ

phir na maiñ raat ga.e tak lauTā
Dūbtī shaam jo ghar se niklā

roza rakhtā huuñ subūhī pī ke hañgām-e-sahar
shaam ko masjid meñ hotā huuñ jamā.at kā sharīk

vahī haiñ qatl-o-ġhārat aur vahī kohrām hai saaqī
tamaddun aur maz.hab kī ye ḳhūnī shaam hai saaqī